Il-Kumitat Ewropew tar-Reġjuni (KtR) qed iniedi sejħa ġdida għall-aħjar prattiki għall-membri u s-sostituti tiegħu, il-Politiċi Eletti Żgħażagħ u l-membri tan-network tal-kunsillieri lokali u reġjonali tal-KtR biex jiġbru u jippromovu proġetti sostenibbli u b’livell baxx ta’ emissjonijiet tal-karbonju, kif ukoll impenji klimatiċi biex jitnaqqsu l-emissjonijiet ta’ gassijiet serra mill-awtoritajiet lokali u reġjonali fl-UE kollha. Ir-reġjun jew il-belt tiegħek għandhom proġett speċifiku mmirat biex jilħaq l-objettivi tal-Patt Ekoloġiku Ewropew? Ir-reġjun jew il-belt tiegħek stabbilixxew mira biex jitnaqqsu l-emissjonijiet ta’ gassijiet serra sal-2030 jew sal-2050? Jekk it-tweġiba hija iva, din is-sejħa ġdida tgħodd għalikom.
Il-pandemija tal-COVID-19 u l-kriżi tal-enerġija kkawżata mill-gwerra fl-Ukrajna wrew kemm hija importanti l-interazzjoni mill-qrib bejn l-ambjent u ċ-ċittadini. Fl-istess ħin, it-theddida tal-perikli naturali, tar-riskji ambjentali, tad-degradazzjoni tal-ekosistema u tat-tisħin globali għadha rilevanti, u l-azzjoni klimatika hija aktar urġenti minn qatt qabel. Il-bliet u r-reġjuni huma atturi ewlenin biex jintlaħqu l-għanijiet tal-Patt Ekoloġiku Ewropew u biex l-UE titqarreb lejn in-newtralità klimatika.
Sabiex tiġi promossa aktar l-azzjoni reġjonali u lokali lejn il-Patt Ekoloġiku, il-Kumitat Ewropew tar-Reġjuni qed iniedi sejħa ġdida għall-aħjar prattiki u impenji klimatiċi għall-membri u s-sostituti kollha tal-KtR, il-Politiċi Eletti Żgħażagħ u l-membri tan-Network Ewropew tal-Kunsillieri Lokali u Reġjonali. Il-proġetti se jikkontribwixxu għall-pjattaforma tal-aħjar prattiki li juru kif il-bliet u r-reġjuni qed jikkontribwixxu għal irkupru ekoloġiku biex tintlaħaq soċjetà aktar sostenibbli, inklużiva u reżiljenti.
Liema proġetti huma eliġibbli?
Il-membri u s-sostituti, il-politiċi eletti żgħażagħ u l-membri tan-network tal-kunsillieri lokali u reġjonali huma mistednin jikkondividu l-proġetti u l-inizjattivi li kisbu dan l-aħħar, jew li għadhom għaddejjin, dwar it-temi li ġejjin:
- Adattament għat-tibdil fil-klima
- Mitigazzjoni tat-tibdil fil-klima
- Ekonomija ċirkolari
- Kwistjonijiet relatati mal-enerġija, bħall-effiċjenza enerġetika, il-faqar enerġetiku jew l-enerġija rinnovabbli
- Mobbiltà nadifa
- Tniġġis żero
- Riforestazzjoni u ekoloġizzazzjoni urbana
- Ibbaġitjar ekoloġiku
Qabel il-Konferenza tan-Nazzjonijiet Uniti dwar it-Tibdil fil-Klima (UNFCCC COP 27) li għandha se ssir f’Sharm El-Sheik, l-Eġittu, f’Novembru 2022, l-impenji dwar il-klima mill-awtoritajiet lokali u reġjonali se jinġabru f’mappa biex jiġu appoġġjati l-isforzi tal-KtR biex jissaħħaħ ir-rwol tal-bliet u r-reġjuni fil-governanza klimatika globali u l-implimentazzjoni tal-Ftehim ta’ Pariġi.
Biex tikkondividi l-proġetti ekoloġiċi u l-impenji klimatiċi tiegħek, jekk jogħġbok imla dan l-istħarriġ qasir.
Il-proġetti u l-impenji se jiġu ppubblikati fil-mappa interattiva tal-KtR u se jkunu promossi lill-istituzzjonijiet tal-UE, il-partijiet interessati u l-istampa.
Il-Patt Ekoloġiku fil-Livell Lokali: ikklikkja hawn biex tiskopri l-portal tal-KtR tal-Patt Ekoloġiku u l-grupp ta’ ħidma.