II-President tal-Kumitat Ewropew tar-Reġjuni (KtR), Karl-Heinz Lambertz, se jagħmel it-tieni diskors tiegħu dwar “ L-Istat tal-Unjoni Ewropea: il-Perspettiva tal-Bliet u r-Reġjuni ” fid-9 ta’ Ottubru, fit-3 pm, fi Brussell. Id-diskors se jsir matul sessjoni plenarja waqt dibattitu speċjali dwar “Il-Ġejjieni tal-Ewropa” flimkien mal-President tal-Parlament Ewropew, Antonio Tajani. Id-dibattitu se jkun segwit mill-adozzjoni tar- rapport tal-KtR dwar “ Il-Ġejjieni tal-Ewropa ”, li hija l-qofol ta’ sentejn ta’ involviment maċ-ċittadini u konsultazzjoni tal-awtoritajiet lokali u reġjonali, kif mitlub mill-President tal-Kunsill Ewropew Donald Tusk .

Id-diskors tal-President tal-KtR Lambertz se jagħti dimensjoni lokali u reġjonali lill-prijoritajiet tal-UE u ħarsa aktar mill-qrib lejn dak li qiegħed verament jiġri fit-toroq u fit-territorji tal-Ewropa.

Id-diskors se jiffoka fuq l-aktar kwistjonijiet urġenti għall-bliet u r-reġjuni fl-Unjoni Ewropea: in-negozjati li jmiss dwar il-baġit fit-tul tal-UE (ir- rapport tal-KtR se jkun adottat dik il-ġurnata stess), il-futur tal-politika reġjonali tal-UE (il-politika ta’ “koeżjoni”), l-integrazzjoni, id-demokrazija tal-UE (l-inklużjoni ta’ reġjuni u bliet fil-proċess tat-teħid ta’ deċiżjonijiet tal-UE, u inizjattivi fil-livell lokali sabiex iċ-ċittadini jitqarrbu mill-ġdid mal-Ewropa), kif ukoll l-iżvilupp sostenibbli u l-kooperazzjoni territorjali.

Dan l-eżerċizzju għandu jitqies ukoll fil-kuntest usa’ tad-dibattitu politiku kontinwu dwar il-ġejjieni tal-Ewropa, filwaqt li nħarsu 'l quddiem lejn l-elezzjonijiet Ewropej 2019 u l-Ewropa ta’ wara l-Brexit . F’dan ir-rigward, wara dibattitu mal-President Tajani, il-KtR se jadotta r-rakkomandazzjonijiet tiegħu dwar il-ġejjieni tal-Ewropa , b’riżultat ta’ konsultazzjoni estensiva li laħqet aktar minn 40 000 ċittadin u 110 awtoritajiet lokali u reġjonali fi 30 pajjiż Ewropew.

Fid-diskors tiegħu, il-President Lambertz se jniedi wkoll it-8 Summit Ewropew tal-KtR tar-Reġjuni u l-Bliet, li għandu jiġi organizzat b’mod konġunt mal-Presidenza Rumena tal-UE u l-muniċipalitajiet Rumeni mill-14 sal-15 ta’ Marzu 2019 f’Bukarest. Is-sena d-dieħla, is-Summit se jkun l-akbar laqgħa politika ta’ sindki, presidenti reġjonali u mexxejja lokali minn madwar l-Ewropa b’aktar minn 800 parteċipant, inklużi l-mexxejja tal-istituzzjonijiet tal-UE.

Id-diskors tal-President Lambertz u d-dibattitu se jixxandru dirett fuq www.cor.europa.eu/sotreg.go u fuq Twitter permezz ta’ #SOTREG .

Araw il-filmat qasir tagħna SOTREG

Nota lill-edituri: " L-Istat tal-Unjoni: il-Perspettiva tar-Reġjuni u l-Bliet " mill-President tal-Kumitat Ewropew tar-Reġjuni, għandu l-għan li jagħti rendikont tas-sitwazzjoni attwali tal-bliet u r-reġjuni b'ħarsa lejn l-isfidi ewlenin għall-Ewropa. Wara d-diskors ikun hemm dibattitu waqt il-plenarja flimkien mal-membri kollha tal-KtR u l-politiċi ta’ livell għoli tal-UE.