Il-mexxejja lokali u reġjonali minn madwar l-Unjoni Ewropea kollha taw l-appoġġ tagħhom għal proposti mill-Kummissjoni Ewropea u mill-Parlament Ewropew imfassla biex isaħħu l-istat tad-dritt, inkluża l-possibilità ta’ sanzjonijiet għal ksur “serju u sistemiku”. Il-Kumitat Ewropew tar-Reġjuni (KtR) ħeġġeġ ukoll lill-istituzzjonijiet tal-UE biex jippromovu kultura ta’ rispett għall-istat tad-dritt billi jinvolvu aktar lill-komunitajiet lokali, inklużi l-amministrazzjonijiet pubbliċi u n-“netwerks ta’” ombudsmen li jaħdmu fil-livell lokali u reġjonali.

Ir-rakkomandazzjonijiet , li ġew adottati fit-12 ta’ Frar fl-ewwel plenarja tal-mandat il-ġdid ta’ ħames snin tal-Kumitat, enfasizzaw il-ħtieġa għal proċess usa’ u aktar profond ta’ monitoraġġ, appoġġjat minn riżorsi adegwati. Ir-riżultat għandu jkun valutazzjoni oġġettiva u trasparenti – ibbażata, pereżempju, fuq il-Lista ta’ Kontroll tal-Istat tad-Dritt żviluppata mill-ogħla entità ta' sorveljanza tal-Ewropa għad-drittijiet tal-bniedem, il-Kunsill tal-Ewropa – li tagħmel użu minn serje ta’ laqgħat matul is-sena kollha fil-livell reġjonali u nazzjonali. Il-proċess ikun iwassal għal konferenza annwali f’belt impenjata b’mod partikolari għal governanza tajba. L-Opinjoni tal-KtR tenfasizza b’mod speċifiku s-siwi li jiġu kkonsultati n-netwerks ġudizzjarji u l-komunitajiet legali lokali, u li jiżdied l-appoġġ finanzjarju għas-soċjetà ċivili u l-midja indipendenti, speċjalment fil-livell lokali.

L-Opinjoni ġiet ippreżentata minn Christophe Rouillon , President tal-Partit tas-Soċjalisti Ewropej u Sindku ta’ Coulaines (Franza). Huwa qal li “L-istat tad-dritt mhuwiex biss wieħed mill-valuri komuni fundamentali tal-Unjoni Ewropea, iżda huwa kundizzjoni eżistenzjali għall-funzjonament tagħha. Is-soċjetà ċivili u l-awtoritajiet lokali u reġjonali għandhom rwol importanti x’jaqdu fit-tisħiħ tal-istat tad-dritt. Aħna nemmnu li huma meħtieġa sanzjonijiet għal dawk li jiksru l-istat tad-dritt, iżda għal dawk li jwettqu r-reat, mhux għall-vittmi. Dan il-Kumitat ilu jargumenta biex ir-reġjuni u l-bliet tal-Ewropa ma jiġux sanzjonati minħabba ksur tal-istat tad-dritt mill-gvernijiet nazzjonali. B’din l-Opinjoni, stabbilixxejna mezzi kif il-kooperazzjoni aktar profonda mal-komunitajiet lokali – is-soċjetà ċivili tagħhom, id-difensuri legali tagħhom, u l-amministrazzjonijiet pubbliċi tagħhom – tista’ tikkontribwixxi għad-difiża u l-promozzjoni ta’ kultura tad-dritt.”

Is-Sur Rouillon żied jgħid li "Ir-rakkomandazzjonijiet tagħna huma sinifikanti għal żewġ raġunijiet. L-ewwel nett, din l-Opinjoni turi li l-politiċi lokali u reġjonali minn madwar l-Ewropa jappoġġjaw l-isforzi biex isaħħu l-istat tad-dritt. It-tieni, dawn ir-rakkomandazzjonijiet jipprovdu ideat speċifiċi għal azzjoni fil-livell lokali u reġjonali. Ir-rinforz tal-istat tad-dritt mhuwiex biss kwistjoni ta’ prinċipju; huwa kwistjoni ta’ valur għall-flus. Aħna nemmnu li l-allokazzjoni ta’ flus għal sistemi b’governanza dgħajfa – u, f’xi każijiet, l-imminar sistematiku tal-istat tad-dritt – hija kontroproduttiva u fiha riskju li tipperikola l-fiduċja tal-Ewropej li fuqha huwa mibni l-proġett ta’ integrazzjoni. Monitoraġġ bir-reqqa u aktar fil-fond mill-UE jkun tajjeb għaċ-ċittadini, id-demokrazija lokali, u l-ekonomiji lokali.”

Ir-rapport inbeda u ġie abbozzat minn Franco Iacop (IT/PSE), kap tal-assemblea reġjonali tal-Friuli Venezia Giulia. Is-Sur Rouillon ippreżenta r-rapport peress li s-Sur Iacop tilef il-mandat fil-KtR f’Diċembru.

Ir-rakkomandazzjonijiet jirriflettu l-konvinzjoni li r-realtà tal-governanza fl-Unjoni Ewropea – li tinvolvi lill-politiċi Ewropej, nazzjonali, reġjonali u lokali u ’l-amministrazzjonijiet pubbliċi – teħtieġ li l-monitoraġġ tal-istat tad-dritt ma jkunx ristrett għal-livell nazzjonali. Bl-istess loġika, il-KtR talab li l-UE – bħala entità legali – tkun hi stess soġġetta għal monitoraġġ, u sostna li l-UE għandha tibda mill-ġdid il-proċess biex tissieħeb mal-Qorti Ewropea tad-Drittijiet tal-Bniedem.

Ideat li l-KtR jixtieq li jiġu esplorati jinkludu mezzi biex jiġi “sfruttat il-potenzjal” tal-Aġenzija tal-UE għad-Drittijiet Fundamentali fis-sistema ta’ monitoraġġ. Il-KtR issuġġerixxa wkoll li proġett pilota li jinvolvi grupp ta’ bliet u reġjuni interessati jkun jista’ jgħin biex jiġu rfinati l-kriterji għall-kejl tal-istat tad-dritt.

Kuntatt:

Andrew Gardner

Tel. +32 473 843 981

andrew.gardner@cor.europa.eu