Bis-saħħa tal-politika ta’ koeżjoni, l-UE qed tinvesti EUR 454 biljun bejn l-2014 u l-2020 biex tnaqqas id-disparitajiet u tappoġġja t-tkabbir sostenibbli fir-reġjuni kollha tagħha, fi sħubija mal-awtoritajiet nazzjonali u l-atturi lokali. F’dokument adottat fil-11 ta’ Mejju, ir-reġjuni u l-bliet qalu li din il-politika tat riżultati tanġibbli u għandha tissaħħaħ fil-futur. B’fondi adatti, aktar flessibbiltà, proċeduri eħfef u integrazzjoni aħjar ma’ għodod ta’ investiment oħrajn tal-UE, il-politika ta’ koeżjoni tista’ twassal biex l-irkupru tal-ekonomiji Ewropej ikun aktar mgħaġġel u aktar inklużiv, biex b’hekk l-Unjoni tkun tista’ tindirizza l-isfidi urġenti bħalma huma l-migrazzjoni, it-tibdil fil-klima u r-reżiljenza territorjali.

Permezz tal-opinjoni dwar il-Futur tal-Politika ta’ Koeżjoni wara l-2020, imħejjija minn Michael Schneider, Segretarju tal-Istat ta’ Sassonja-Anhalt u President tal-Grupp tal-PPE tal-KtR, il-Kumitat Ewropew tar-Reġjuni huwa l-ewwel istituzzjoni tal-UE li adottat pożizzjoni formali dwar kif għandha tiġi żviluppata l-politika ta’ investiment ewlenija tal-UE għas-27. L-opinjoni hija bbażata fuq l-evidenza minn studji u konsultazzjonijiet, u għandha l-għan li tagħti direzzjoni politika għall-proposti dwar il-baġit tal-UE wara l-2020.

Il-mexxejja lokali u reġjonali tal-UE jgħidu li l-politika tal-koeżjoni futura għandha tkun mibnija bil-kunsiderazzjoni li, matul dawn l-aħħar għaxar snin, mijiet ta’ eluf ta’ proġetti appoġġjati permezz tal-Fondi Strutturali u ta' Investiment Ewropej (Fondi SIE) irnexxielhom joħolqu l-impjiegi, jimmodernizzaw l-infrastruttura, isaħħu l-kapital uman u jtejbu l-kwalità tal-ħajja.

Minkejja dan, ir-reġjuni u l-bliet huma konxji li l-politika ta’ koeżjoni tista’ tiddgħajjef minħabba l-impatt finanzjarju tal-Brexit u l-pressjoni politika biex jiġu ffinanzjati prijoritajiet ġodda bħalma huma d-difiża, is-sigurtà, il-kontrolli fil-fruntieri jew l-għodod ta’ investiment amministrati ċentralment mill-istituzzjonijiet tal-UE. Il-Kumitat jopponi kwalunkwe devjazzjoni tal-fondi u jitlob li, anke wara l-Brexit, il-perċentwali attwali tas-sehem mill-baġit tal-UE allokat għall-politika ta’ koeżjoni jibqa’ l-istess.

“ Il-migrazzjoni, is-sigurtà jew l-istrumenti ta’ investiment ġodda qed jingħataw aktar attenzjoni fid-dibattitu pubbliku iżda l-politika ta’ koeżjoni ma tistax tingħata l-ġenb fl-istess mument meta aħna qed nippruvaw nindirizzaw l-Ewroxettiċiżmu u niġġieldu favur aktar għaqda fost iċ-ċittadini tagħna. Din hija l-aktar strument Ewropew impressjonanti ta’ solidarjetà u li tneħħi d-distakki bejn il-komunitajiet. Tgħin biex il-benefiċċji tal-integrazzjoni Ewropea jitqassmu b’mod aktar ekwu fost iċ-ċittadini Ewropej u biex titrawwem l-unità tagħna f’dinja li qed tiġi globalizzata ”, qal is-Sur Schneider wara l-votazzjoni fil-plenarja.

Il-Kumitat - l-assemblea tal-Ewropa tar-rappreżentanti reġjonali u lokali - jistieden lill-istituzzjonijiet l-oħrajn tal-UE u lill-Istati Membri biex joqogħdu fuq il-politika ta’ koeżjoni bħala pjattaforma parteċipatorja, demokratika u miftuħa bl-għan li tingħata spinta ġdida lill-proġett Ewropew, titnaqqas id-distanza bejn l-istituzzjonijiet tal-UE u ċ-ċittadini, u biex is-solidarjetà tal-UE ssir realtà tanġibbli f’kull rokna tal-Ewropa.

Il-President tal-KtR, Markku Markkula , qal li " L-aħjar mod għall-ġlieda konta l-populiżmu huwa permezz tal-azzjoni. Huwa biss permezz tal-ħolqien tal-impjiegi u t-tkabbir madwar ir-reġjuni u l-bliet kollha tal-Ewropa li nistgħu nuru li l-UE hi rilevanti. L-opinjoni ta’ Schneider turi d-determinazzjoni tagħna li l-politika ta’ koeżjoni għandu jkompli jkollha rwol fil- ġejjieni tal-Ewropa. Bħala l-istituzzjoni tal-UE tal-mexxejja reġjonali u lokali, qegħdin inħeġġu l-istabbiliment ta’ alleanza qawwija ta’ dawk kollha favur koeżjoni iktar sempliċi u iktar effettiva li ttejjeb il-ħajja ta’ kuljum ta’ kull ċittadin ”.

Dan l-appell intlaqa’ mill-Kummissarju tal-Baġit tal-UE, Günther H. Oettinger meta qal li: “minkejja li t-tnaqqis huwa inevitabbli u ma jistax jiġi eskluż wara l-Brexit, se nkun qed niġġieled kontra kwalunke tnaqqis mill-politika ta’ koeżjoni”, matul id-dibattitu fil-plenarja, filwaqt li saħaq li “iktar ma nuru l-valur miżjud li ġġib għall-UE, se nkun qed inwasslu aktar il-messaġġ li l-iżvilupp ta’ programm ta’ koeżjoni sostenibbli se jkun ta’ benefiċċju għal kull wieħed minna”.

Sabiex tittejjeb l-effettività tagħha, il-KtR jħeġġeġ lill-UE biex tindirizza l-kumplessità u r-riġidità li qed iżżomm lura r-ritmu fl-implimentazzjoni tal-politika ta’ koeżjoni. Fin-nuqqas ta’ semplifikazzjoni u flessibilità adatti, huma jsostnu li l-ispejjeż amministrattivi eċċessivi,flimkien ma’ inċertezza legali u finanzjarja dejjem akbar, qed jirriskjaw li jheddu l-impatt u l-valur miżjud tal-politika għall-benefiċjarji.

Proposti tal-Kumitat

Fondi adatti : jiġi żgurat li fil-Baġit tal-UE (Qafas Finanzjarju Pluriennali) l-politika ta’ koeżjoni tkun tista’ sserraħ fuq l-istess perċentwal ta’ sehem mir-riżorsi allokati fil-fażi attwali (madwar terz tat-total); fir-rigward tal-bilanċ bejn l-inizjattivi bbażati fuq l-għotjiet u dawk fuq is-self, il-Kumitat huwa kontra kwalunke obbligu sabiex jikber aktar l-użu tas-self matul il-perjodu ta’ programmazzjoni li jmiss. It-taħlita t-tajba ta’ strumenti finanzjarji u għotjiet għandha tiġi deċiża fil-livell lokali mill-awtoritajiet lokali u reġjonali.

Struttura bażika konsolidata: l-istruttura attwali tal-politika għandha tiġi kkonfermata bit-tliet kategoriji tagħha (reġjuni l-aktar żviluppati, reġjuni fi tranżizzjoni u reġjuni inqas żviluppati) Il-prodott domestiku gross (PDG) reġjonali bħala l-indikatur ewlieni għandu jkun ikkomplementat bi kriterji armonizzati u konsistenti relatati mas-suq tax-xogħol u l-isfidi speċifiċi (soċjali, ambjentali, ġeografiċi, naturali u demografiċi).

Aktar flessibbiltà: titnaqqas il-burokrazija fl-ippjanar u l-ġestjoni tal-Fondi SIE. Il-konċentrazzjoni tematika għandha tinżamm biex jiżdied l-impatt fil-livell lokali, iżda din m’għandhiex tipprekludi s-sostenn finanzjarju għall-infrastruttura fl-oqsma ta’ prijorità. Il-programmi ta’ investiment futuri għandhom ikunu adattabbli permezz ta’ proċeduri semplifikati sabiex jipprovdu rispons għall-kriżijiet u l-avvenimenti mhux previsti (bħalma huma l-flussi intensi tar-refuġjati jew id-diżastri naturali).

Semplifikazzjoni: fil-preżent is-sistema implimentattiva hija regolata żżejjed u kkumplikata wisq, b’numru eċċessiv ta’ rekwiżiti ta’ ġestjoni u ta’ sistemi ta’ kontroll. Għaldaqstant, il-Kumitat irid li l-proċeduri jiġu semplifikati b’mod radikali b’qafas legali ġdid li għandu jiġi ppreżentat qabel il-bidu tal-perjodu ta’ programmazzjoni l-ġdid (sa mhux aktar tard minn nofs l-2019). Għandha tiġi evitata kwalunkwe applikazzjoni retroattiva ta’ standards ġodda, filwaqt li r-rekwiżiti ta’ ġestjoni u s-sistemi ta’ kontroll għandhom jiġu semplifikati sabiex l-awtoritajiet ta’ ġestjoni jkunu jistgħu jagħżlu jekk jimplimentawx il-programmi abbażi tal-liġi nazzjonali jew abbażi tal-liġi tal-UE.

Strateġija komuni: il-KtR jitlob li tiġi evitata d-duplikazzjoni u li tittejjeb il-koordinazzjoni billi jiġi żviluppat Qafas Strateġiku Komuni ġdid li jkopri l-politiki ta’ tkabbir u l-fondi kollha tal-UE li għandhom impatt fuq l-iżvilupp reġjonali, inklużi Fondi SIE, il-Faċilità Nikkollegaw l-Ewropa, il-programm LIFE, il-programm Orizzont 2020, l-FEIS, il-faċilitajiet ta’ self tal-BEI. B’mod partikolari, il-Fondi SIE u l-FEIS għandhom rwoli u kamp ta’ applikazzjoni differenti iżda, peress li jikkumplementaw lil xulxin, jeħtieġ li jkun aktar faċli li dawn jiġu integrati sabiex jiġu mmobilizzati l-investiment pubbliku u dak privat għal għanijiet strateġiċi.

Sħubija ġenwina: ir-reġjuni u l-bliet jixtiequ li l-Kodiċi ta’ Kondotta dwar is-Sħubija tkun inkluża fir-regolamenti legalment vinkolanti tal-Fondi SIE sabiex jiġi żgurat li l-fondi jkunu ppjanati u ġestiti permezz ta’ kooperazzjoni ġenwina bejn l-UE u l-awtoritajiet nazzjonali, reġjonali u lokali.

Governanza ekonomika aħjar: ir-rabta bejn il-Fondi SIE u l-koordinazzjoni tal-politiki ekonomiċi tal-Istati Membri fis-Semestru Ewropew jeħtieġu jissaħħu, b’attenzjoni xierqa lid-dimensjoni territorjali tal-programmi ta’ riforma nazzjonali u lir-rakkomandazzjonijiet speċifiċi għal kull pajjiż. Min-naħa l-oħra, il-Kumitat jixtieq li titneħħa kwalunkwe kundizzjonalità, minħabba r-riskju li l-pjani ta’ investiment tal-bliet u r-reġjuni jispiċċaw ostaġġi minħabba nuqqasijiet tal-gvern nazzjonali.

Għal iktar tagħrif:

Infografika dwar il-futur tal-Politika ta' Koeżjoni

Studji tal-KtR dwar il-futur tal-Politika ta' Koeżjoni

Evalwazzjonijiet tal-perjodu ta’ programmazzjoni 2007-2013

Portal tad-data miftuħa tal-politika ta’ koeżjoni tal-UE

Stqarrija tal-President Markkula fil-Kunsill Affarijiet Ġenerali tal-25 ta’ April dwar il-Koeżjoni

Kuntatt:
Pierluigi Boda

Tel: +32 2 282 2461

Mowbajl: +32 473 85 17 43

pierluigi.boda@cor.europa.eu