Il-mexxejja lokali tal-UE għandhom jadottaw id-dikjarazzjoni tal-Ukrajna

#EUlocal #sommetvillesetregions

F’mument kruċjali għall-Ewropa, il-Kumitat Ewropew tar-Reġjuni flimkien mar-Reġjun ta’ Provence-Alpes-Côte d’Azur ser jilqgħu 2000 mexxej internazzjonali, nazzjonali, lokali u reġjonali f’Marsilja fit-3 u l-4 ta’ Marzu. Id-9 Summit Ewropew tar-Reġjuni u l-Bliet qed jiġi organizzat fil-kuntest tal-Presidenza Franċiża tal-Kunsill tal-UE . Fl-isfond tal-invażjoni tar-Russja fl-Ukrajna, il-mexxejja lokali u reġjonali tal-UE se jesprimu formalment l-appoġġ tagħhom għall-poplu tal-Ukren. Huma se jaqsmu wkoll il-viżjoni tagħhom għall-Ewropa, u jappellaw għat-tisħiħ tal-pedamenti demokratiċi tal-UE u għal bidla fundamentali sabiex il-komunitajiet lokali jiġu mgħammra aħjar biex jindirizzaw sfidi bħall-provvista tal-kura tas-saħħa, id-diżastri naturali, it-tibdil fil-klima u d-disparitajiet territorjali.

Il-politiċi eletti lokali u reġjonali se jadottaw it-talbiet finali tagħhom għall- Konferenza dwar il-Futur tal-Ewropa fil-forma ta’ “Manifest tal-awtoritajiet reġjonali u lokali għad-demokrazija Ewropea”, li jenfasizza li l-funzjonament demokratiku tal-UE jirrikjedi involviment akbar tar-reġjuni, il-bliet u l-irħula, kif ukoll it-tisħiħ tal-involviment demokratiku, b’mod partikolari taċ-ċittadini u ż-żgħażagħ. L-enfasi għandha tkun fuq il-bini ta’ rkupru inklużiv wara l-kriżi tal-COVID-19, it-tisħiħ tal-koeżjoni territorjali u soċjali fl-Ewropa, u l-appoġġ għat-tranżizzjonijiet ekoloġiċi u diġitali.

Il-President tal-Kumitat Ewropew tar-Reġjuni, Apostolos Tzitzikostas , qal, “Dan is-Summit f’Marsilja jiġbor eluf ta’ mexxejja Ewropej kontra l-invażjoni brutali tal-Ukrajna mir-Russja. Il-mexxejja se jingħaqdu flimkien f’solidarjetà, għall-paċi, id-demokrazija, id-djalogu u d-drittijiet fundamentali għall-poplu tal-Ukrajna u se jiddiskutu kif joffrulu għajnuna konkreta. Din hija opportunità biex jaffermaw mill-ġdid li l-isfidi ewlenin – is-sigurtà, il-protezzjoni tad-drittijiet tal-bniedem, l-emerġenza klimatika, is-servizzi pubbliċi u d-disparitajiet reġjonali – jirrikjedu unità Ewropea u reazzjonijiet Ewropej komuni li joriġinaw fir-reġjuni, il-bliet u l-irħula tagħna. Is-Summit jindirizza t-titjib tad-demokrazija Ewropea sabiex tipproteġi, tappoġġja u ttejjeb il-ħajja ta’ kull ċittadin ġewwa u barra l-fruntieri tal-UE, u b’hekk iqarreb l-UE lejn il-poplu”.

Renaud Muselie r, president tar-Reġjun ta’ Provence-Alpes-Côte d’Azur Region u viċi president tar-Reġjuni ta’ Franza qal: “Fi żmien meta l-gwerra tinsab fuq l-għatba tagħna, jeħtiġilna naffermaw bil-qawwa li ngħożżu l-Ewropa, li neħtieġu l-Ewropa u li l-Ewropa tipproteġina. Ir-reġjun tagħna ried ipoġġi lill-Ewropa lura fil-qalba tal-iżvilupp ekonomiku, ambjentali u diġitali. Id-9 Summit tar-Reġjuni u l-Bliet huwa ta’ natura speċjali. Nixtieq nirringrazzja lill-President Tzitzikostas u lill-Kumitat Ewropew tar-Reġjuni għall-kwalità tal-ħidma li qed inwettqu flimkien f’dan il-mument kruċjali. It-territorji, is-sindki, il-presidenti reġjonali u r-rappreżentanti eletti lokali Ewropej, li jgħożżu l-Ewropa, issa huma meħtieġa aktar minn qatt qabel biex nibnu l-futur tad-demokrazija Ewropea deċentralizzata. Huma dawk li jirrappreżentaw l-aħjar il-proġett Ewropew, għalhekk ejja nsaħħu l-pożizzjoni tagħhom! Lil hinn minn dan is-Summit, jeħtiġilna niżguraw li l-Presidenza Franċiża tal-Unjoni Ewropea tkun ta’ suċċess. Jeħtieġ li Franza tkun il-mutur biex l-Ewropa tilħaq riżultati u kisbiet kbar.”

Is-Summit ta’ jumejn se jinfetaħ mill- President Tzitzikostas , il- President Renaud Muselier , Jacqueline Gourault , il-Ministru Franċiż għall-Koeżjoni Territorjali u r-Relazzjonijiet mal-Awtoritajiet Lokali u Reġjonali, Clément Beaune , Segretarju tal-Istat Franċiż għall-Affarijiet Ewropej, Martine Vassal , President tal-Metropoli Aix-Marseille-Provence u tal-Kunsill tad-Dipartiment ta’ Bouches-du-Rhône, Benoit Payan , Sindku ta’ Marsilja, u minn André Viola , Kap tad-Delegazzjoni Franċiża għall-Kumitat Ewropew tar-Reġjuni.

Il-programm se jkun strutturat fuq erba’ temi:

1. 3 ta’ Marzu: It-territorji Ewropej qed jiffaċċjaw sfidi soċjetali kbar (3 ta’ Marzu): Din il-plenarja u tliet dibattiti roundtable ta’ livell għoli se jiffokaw fuq it-tisħiħ tar-reżiljenza tas-saħħa, l-aċċelerazzjoni tat-tranżizzjoni diġitali, u l-antiċipazzjoni, il-prevenzjoni tar-riskji klimatiċi u l-adattament għalihom. Il-kelliema ewlenin jinkludu Werner Hoyer , President tal-Bank Ewropew tal-Investiment, Frans Timmermans , Viċi President Eżekuttiv tal-Kummissjoni Ewropea, David Gallagher , President Reġjonali ta’ Pfizer, u Mami Mizutori , Kap tal-UNDRR.

2. 3 ta’ Marzu Koeżjoni u Rkupru : Ir-rwol tal-politika ta’ koeżjoni tal-UE fl-irkupru ta’ wara l-pandemija se jkun it-tema ta’ dibattitu li jinkludi lil Elisa Ferreira , Kummissarju Ewropew għall-Koeżjoni u r-Riformi, Jacqueline Gourault , Ministru Franċiż għall-Koeżjoni territorjali u r-relazzjonijiet mal-awtoritajiet lokali u reġjonali, u Younous Omarjee , President tal-Kumitat REGI tal-Parlament Ewropew. Ir-rivitalizzazzjoni taż-żoni rurali, il-kooperazzjoni transfruntiera, is-sħubija Ewro-Mediterranja u t-tkabbir tal-UE huma fost is-suġġetti tad-diskussjonijiet roundtable.

3. 4 ta’ Marzu Nibnu id-Dar Ewropea tad-Demokrazija : il-Viċi Presidenti tal-Kummissjoni Ewropea Margaritis Schinas (Promozzjoni tal-Istil ta’ Ħajja Ewropew Tagħna) u Dubravka Šuica (Demokrazija u Demografija), Roberta Metsola , il-President tal-Parlament Ewropew, Christa Schweng , il-President tal-Kumitat Ekonomiku u Soċjali Ewropew, Vasco Alves Cordeiro , l-Ewwel Viċi President tal-Kumitat Ewropew tar-Reġjuni, u l-MEP Eva Maydell , il-President tal-Moviment Ewropew, se jingħaqdu fid-dibattitu mal-mexxejja lokali dwar is-sitwazzjoni attwali dwar il-Konferenza dwar il-Futur tal-Ewropa, li għandha l-għan li tagħti leħen aktar b’saħħtu liċ-ċittadini Ewropej fil-proċess tat-teħid ta’ deċiżjonijiet tal-UE. Se jiġi diskuss ukoll ir-rwol tal-awtoritajiet lokali u reġjonali fil-promozzjoni tal-valuri demokratiċi Ewropej.

4. 4 ta’ Marzu Il-Futur tad-Demokrazija Ewropea : L-involviment taż-żgħażagħ u l-valuri Ewropej : Id-diskussjonijiet ta’ waranofsinhar se jiddiskutu kif tista’ titwessa’ l-parteċipazzjoni taż-żgħażagħ fil-ħajja ċivika u demokratika, fil-kuntest tat-trasformazzjoni diġitali u l-isfidi għall-valuri Ewropej. Is-sessjoni finali se tinkludi t-tnedija tal-proċess ta’ kokreazzjoni ta’ Karta Ewropea dwar iż-Żgħażagħ u d-Demokrazija, u skambju ta’ ideat bejn il-President tal-Forum Ewropew taż-Żgħażagħ Silja Markkula u l-koospitanti tas-Summit Apostolos Tzitzikostas u Renaud Muselier .

Aktar informazzjoni:

Is-Summit Ewropew tar-Reġjuni u l-Bliet huwa organizzat mill-Kumitat Ewropew tar-Reġjuni (KtR) biex jiddiskuti l-isfidi futuri tal-UE. Il-parteċipanti jinkludu membri tal-KtR, politiċi eletti prominenti oħra mil-livell lokali u reġjonali, parteċipanti tal-programm Politiċi Eletti Żgħażagħ tal-KtR, kif ukoll rappreżentanti tal-ogħla livell ta’ istituzzjonijiet oħra tal-UE u organizzazzjonijiet tas-soċjetà ċivili.

Id-9 Summit Ewropew tar-Reġjuni u l-Bliet ser isir fit-3-4 ta’ Marzu fil-Palazz Chanot tal-Kungressi u l-Wirjiet f’Marsilja, bil-possibbiltà ta’ parteċipazzjoni fiżika jew online.

• Programm sħiħ tal-midja
• Aqra hawnhekk il-konklużjonijiet ta’ sensiela ta’ attivitajiet ta’ sensibilizzazzjoni organizzati bi tħejjija għall-avveniment.
• Żur il-fiera virtwali li se ssir flimkien mas-Summit bejn it-18 ta’ Frar u t-18 ta’ Marzu 2022 – għażla ta’ proġetti u inizjattivi żviluppati biex isaħħu r-reżiljenza u jappoġġjaw l-innovazzjoni u l-kreattività.

Persuna ta’ kuntatt:

Lauri Ouvinen

Tel. +32 473536887

lauri.ouvinen@cor.europa.eu