Ikklikkja hawn biex tikseb traduzzjoni awtomatika tat-test ta’ hawn taħt.
Brexit: Il-Kumitat Ewropew tar-Reġjuni jniedi Grupp ta’ Kuntatt tar-Renju Unit  

Il-Kumitat Ewropew tar-Reġjuni (KtR) nieda Grupp ta’ Kuntatt tar-Renju Unit maħsub biex iżomm linji ta’ komunikazzjoni bejn l-awtoritajiet lokali u reġjonali fl-Unjoni Ewropea u l-bliet, ir-reġjuni u l-amministrazzjonijiet devoluti tar-Renju Unit. L-inizjattiva ssegwi l-ħruġ tar-Renju Unit mill-UE fil-31 ta’ Jannar 2020.

L-ewwel laqgħa tal-Grupp ta’ Kuntatt, li saret permezz ta’ vidjokonferenza fit-22 ta’ Settembru, kienet laqgħa preparatorja limitata għal politiċi mis-27 Stat Membru tal-UE. Il-gvernaturi, is-sindki u l-kunsilliera lokali ġew indirizzati minn Michel Barnier , il-Kap Negozjatur għall-Unjoni Ewropea, u minn Kati Piri (NL/PSE), il-ko-rapporteur tal-Parlament Ewropew dwar in-negozjati għal sħubija ġdida mar-Renju Unit.

L-UE qed taħdem biex jintlaħaq ftehim dwar ir-relazzjonijiet futuri mar-Renju Unit sal-31 ta’ Ottubru. Il-ftehim imbagħad ikun jeħtieġ ratifika mill-Parlament Ewropew. Mingħajr ftehim, ir-rabtiet legali eżistenti bejn l-UE u r-Renju Unit se jiskadu fil-31 ta’ Diċembru 2020.

Il-grupp ta’ Kuntatt huwa ppresedut minn Loïg Chesnais-Girard (FR/PSE), president tal-Kunsill Reġjonali ta’ Bretanja. Is-Sur Chesnais-Girard qal: “L-istaġnar attwali bejn l-Unjoni Ewropea u r-Renju Unit m’għandux jagħlaq il-bieb għaż-żamma tal-kooperazzjoni fil-livell reġjonali u lokali, għaliex – ikun xi jkun ir-riżultat tan-negozjati – l-awtoritajiet lokali u reġjonali ser ikollhom jaħdmu flimkien lil hinn mill-2020. Nagħmlu l-kuraġġ meta naraw li l-membri tal-gvernijiet lokali, il-parlamenti devoluti u l-assemblej madwar ir-Renju Unit urew interess qawwi fiż-żamma ta’ rabta magħna. Il-Brexit se jkollu konsegwenzi kbar fuq ħafna reġjuni u bliet Ewropej, bħal Bretanja. Il-vuċi tagħna trid tinstema’ u għandhom jiddaħħlu fis-seħħ skemi ta’ appoġġ disponibbli għar-reġjuni, bħar-riżerva ta’ aġġustament tal-Brexit.”

Il-President tal-Kumitat Ewropew tar-Reġjuni – Apostolos Tzitzikostas (EL/PPE), gvernatur tal-Maċedonja Ċentrali fil-Greċja – qal: “Il-gvernijiet lokali u reġjonali se jkunu l-ewwel li jaraw il-konsegwenzi tan-negozjati finali dwar il-Brexit fuq il-ħajja tan-nies. Fi żmien meta l-komunitajiet jeħtieġu stabbiltà, ebda ftehim, immexxi ideoloġikament u politikament, se jżomm lura l-irkupru u jhedded il-paċi fil-gżira tal-Irlanda. Il-grupp ta’ Kuntatt bejn ir-Renju Unit u l-UE jfittex li jipproteġi r-rabtiet mill-qrib mibnija tul għexieren ta’ snin bejn il-mexxejja lokali u reġjonali sabiex ikunu jistgħu jaqsmu t-tħassib tagħhom, itaffu l-impatt tal-Brexit, u jipproteġu l-kooperazzjoni fl-interessi taċ-ċittadini tagħhom.”

Il-grupp ta’ Kuntatt se jiltaqa’ sa tliet darbiet fis-sena biex jiddiskuti kwistjonijiet marbuta mal-kummerċ, il-moviment ta’ oġġetti, persuni u servizzi, u metodi biex titkompla l-kooperazzjoni transfruntiera.

Huwa korp unilaterali magħmul minn 12-il membru sħiħ mill-KtR, flimkien ma’ osservatur mill-Grupp tal-Ħodor li għadu kif ġie ffurmat mill-KtR. Il-grupp ta’ Kuntatt tar-Renju Unit se jistieden rappreżentanti tal-gvern lokali u parlamenti u assemblej devoluti tar-Renju Unit għal-laqgħa tiegħu, abbażi tal-aġenda ta’ kull laqgħa partikolari. Il-grupp ta’ Kuntatt jista’ wkoll jaċċetta stediniet mill-gvernijiet lokali, parlamenti devoluti u assemblej tar-Renju Unit biex jospitaw laqgħat fir-Renju Unit.

Qabel il-ħruġ tar-Renju Unit, id-delegazzjoni tar-Renju Unit tal-KtR ħeġġet il-ħolqien ta’ korp biex iżomm u jrawwem relazzjonijiet tajbin bejn l-awtoritajiet lokali u reġjonali fl-UE u fir-Renju Unit.

Flimkien mas-Sur Chesnais-Girard, il-membri tal-KtR tal-Grupp ta’ Kuntatt huma: Ellen Nauta-Van Moorsel (NL/PPE), kap tad-delegazzjoni Netherlandiża u sindku ta’ Hof van Twente; Michael Murphy (IE/PPE), kap tad-delegazzjoni Irlandiża tal-KtR u membru tal-Kunsill tal-Kontea ta’ Tipperary; Ximo Puig i Ferrer (ES/PSE), president tar-reġjun ta’ Valencia; Aleksandra Dulkiewicz (PL/PPE), sindku ta’ Gdańsk; Erik Flyvholm (DK/Renew Europe), sindku ta’ Lemvig; Pehr Granfalk (SE/PPE), sindku ta’ Solna; Antje Grotheer (DE/PSE), viċi president tal-Parlament tal-Belt ta’ Bremen; Michiel Rijsberman (NL/Renew Europe), membr tal-kunsill provinċjali ta’ Flevoland; Maria Gomes (PT/PSE), sindku ta’ Portimão; Karl Vanlouwe (BE/AE), membru tal-parlament Fjamming u Oldřich Vlasák (CZ/ECR), kunsillier tal-belt minn Hradec Králové. Henrike Müller (DE), membru tal-Parlament tal-Belt ta’ Bremen, huwa l-osservatur tal-Grupp tal-Ħodor.

Kuntatti

Andrew Gardner

Tel. +32 473 843 981

andrew.gardner@cor.europa.eu

Ikkondividi :