L-Unjoni Ewropea għandha tirreaġixxi għat-telf terribbli tal-ħajja kkawżat minn terremoti fl-Italja din is-sena billi tħaddan politika fit-tul ta’ għajnuna għar-rinnovazzjoni ta’ bini u infrastruttura vulnerabbli, jgħid il-Kumitat Ewropew tar-Reġjuni f’sett ta’ rakkomandazzjonijiet ta’ politika adottat fil-11 ta’ Ottubru. Fost il-proposti, l-assemblea tal-UE tal-awtoritajiet lokali u reġjonali jenfasizzaw li l-Unjoni Ewropea u l-Istati Membri tal-UE għandhom iżidu l-finanzjament għal xogħol ta’ rinnovazzjoni, u tressaq l-argument li l-investiment ser iwassal għal dividendi ekonomiċi u jista’ jnaqqas l-emissjonijiet tal-klima, kif ukoll inaqqas l-imwiet.
Ir-rapport – “Politika Ewropea dwar l-adattament antisismiku tal-istokk tal-bini u tal-infrastruttura” – tfassal fuq l-inizjattiv a tal-Kumitat Ewropew tar-Reġjuni (KtR) stess, u ġie adottat fl-istess żmien tal-Jum Internazzjonali għat-Tnaqqis tar-Riskju tad-Diżastri fit-13 ta’ Ottubru. Il-KtR qed jaħdem mal-Uffiċċju tan-Nazzjonijiet Uniti għat-Tnaqqis tar-Riskju tad-Diżastri (UNISDR) biex l-awtoritajiet lokali u reġjonali madwar l-Ewropa jitħeġġu jipproteġu l-komunitajiet tagħhom kontra l-ħsara kkawżata minn diżastri naturali.
Ir-relatur tal-KtR, Vito Santarsiero (IT/PSE), membru tal-kunsill reġjonali ta’ Basilicata fin-Nofsinhar tal-Italja, iwissi: “Avveniment naturali perikoluż m’għandux iwassal għal diżastri fl-iskala li rajna dis-sena fl-Italja. Bini vulnerabbli jagħmel id-differenza bejn problema u diżastru. Jeħtieġ li nagħmlu l-bini tagħna reżiljenti. Dan ser jiswa l-flus, iżda nistgħu nikkombinaw ukoll din ir-rinnovazzjoni – “adattament” – ma’ sforzi biex tiżdied l-effiċjenza fl-użu tal-enerġija, li tiffranka l-flus u tgħin l-ambjent. U, ovvjament, irridu niftakru wkoll fl-ispejjeż li nġarrbu jekk ma nagħmlu xejn: matul l-aħħar ħamsin sena, l-Italja tilfet mitt persuna u madwar EUR 3 biljun kull sena b’riżultat ta’ terremoti, li ta’ spiss titfa’ lill-ekonomiji lokali f’riċessjoni għal snin twal u tipperikola l-iżvilupp tal-futur. L-UE għandha standards tekniċi tajbin għall-bini kontra t-terremoti u dejjem tagħti għajnuna finanzjarja kbira fl-attivitajiet ta’ tindif tal-effetti tat-terremoti; iżda għandha tinvesti iktar fil-prevenzjoni, billi żżomm f’moħħha r-riskji tat-terremoti meta tiddeċiedi fejn għandhom jintefqu l-fondi reġjonali tagħha u billi titlob li l-infrastruttura kollha li tinbena bil-fondi tal-UE tkun reżiljenti għad-diżastri. Barra minn hekk, dawn il-miżuri ser jgħinuna wkoll biex nindirizzaw avvenimenti naturali oħra, bħall-għargħar u l-mewġiet ta’ sħana, li qed isiru dejjem aktar komuni bit-tibdil fil-klima.”
Is-Sur Santarsiero kompla: “Ir-rakkomandazzjonijiet tagħna huma ħafna iktar minn sempliċiment flus. Il-prevenzjoni tfisser li jkun hemm informazzjoni preċiża, li l-amministrazzjonijiet lokali jkunu kapaċi, li l-komunitajiet ikunu jafu jirreaġixxu, u li jkun hemm servizzi ta’ emerġenza effettivi – u f’dawn l-oqsma kollha l-amministrazzjonijiet lokali huma importanti ħafna. Għandna proposti li jistgħu jgħinu f’dawn l-oqsma kollha, inklużi l-adozzjoni ta’ pjan ta’ azzjoni fil-livell tal-UE u appell għal aktar riċerka dwar it-terremoti.”
Is-Sur Santarsiero qal li hemm sfida partikolari sabiex sidien anzjani tad-djar jieħdu azzjoni preventiva, u nnota li, filwaqt li l-Italja, il-Greċja u r-Rumanija huma f’riskju partikolari, it-terremoti huma ta’ periklu “moderat” f’partijiet mill-Portugall, Spanja, u Franza. It-terremoti għandhom ukoll il-potenzjal li jwasslu għal tsunamis fil-Mediterran, minn Lisbona sa Kreta.
F’Mejju 2017, il-President, l-ewwel Viċi President u l-mexxejja tal-ħames gruppi politiċi fil-KtR, marru fuq missjoni ta’ ġbir ta’ informazzjoni fir-reġjuni Taljani ta’ Umbria, Lazio, Abruzzo u Marche biex jifhmu l-ħsara kkawżata mit-terremoti.
Fit-12 ta’ Ottubru, waqt konferenza organizzata mill-KtR u l-UNISDR, is-Sur Santarsiero ser jippresiedi diskussjonijiet dwar il-ġestjoni tar-riskji ta’ diżastri ma’ rappreżentanti mill-Bank Ewropew tal-Investiment, il-Bank Dinji u l-Grupp Zurich Insurance.
Fl-2016, il-Kumitat Ewropew tar-Reġjuni u l-UNISDR iffirmaw pjan ta’ azzjoni għal ħames snin bil-għan li jiżdied l-għadd ta’ bliet u reġjuni Ewropej li jieħdu passi sabiex inaqqsu r-riskji ta’ diżastri. L-UNISDR jiġġestixxi l-Qafas ta’ Sendai għat-Tnaqqis tar-Riskju ta’ Diżastri 2015-2030 tan-Nazzjonijiet Uniti, li jenfasizza r-rabtiet bejn il-perikli naturali, l-azzjoni klimatika u l-iżvilupp sostenibbli. Il-Qafas ta’ Sendai huwa voluntarju; s’issa rreġistraw 3 678 muniċipalità mal-inizjattiva mill-iktar livell baxx tal-UNISDR mal-gvernijiet lokali intitolata Making Cities Resilient.
Kuntatt:
Andrew Gardner
Tel. +32 473 843 981
andrew.gardner@cor.europa.eu