Il-mexxejja lokali u reġjonali tal-UE nġabru f’Sofija fis-7 ta’ Ġunju fejn appellaw biex jiġi evitat it-tnaqqis ta’ 10 % għall-politika ta’ koeżjoni ppjanat mill-Kummissjoni Ewropea fil-proposta tagħha għall-baġit tal-UE 2021-2027. Flimkien mal-Presidenza Bulgara tal-Kunsill tal-UE, huma appellaw biex jiġu assigurati biżżejjed riżorsi u titjib tar-regoli sabiex jiġi żgurat li t-tnaqqis fid-differenzi billi jkunu involuti l-atturi lokali jibqa’ l-objettiv ewlieni u l-funzjoni futura tal-fondi strutturali u ta’ investiment Ewropej.
Fis-6 u s-7 ta’ Ġunju, il-Kummissjoni għall-Politika ta’ Koeżjoni Territorjali (COTER) tal-Kumitat Ewropew tar-Reġjuni organizzat flimkien mal- Assoċjazzjoni Nazzjonali tal-Muniċipalitajiet tar-Repubblika tal-Bulgarija (NAMBR), organizzat konferenza ffukata fuq l-implikazzjonijiet tal-abbozzi ta’ proposti tal-Kummissjoni Ewropea għall-Qafas Finanzjarju Pluriennali (QFP) li jmiss – li jistipula limiti annwali ta’ infiq għall-politiki kollha tal-UE bejn l-2021-2027 u r-regolamenti l-ġodda għal fondi.
“ Aħna napprezzaw l-impenn tal-Presidenza Bulgara tal-UE favur politika ta’ koeżjoni b’saħħitha. Permezz ta’ kooperazzjoni bejn l-UE, il-gvern nazzjonali u l-amministraturi lokali, il-Bulgarija hija eżempju ta’ kif il-politika ta’ koeżjoni tista’ ttejjeb il-ħajja taċ-ċittadini, toħloq infrastruttura aħjar, ittejjeb l-edukazzjoni, tiġġieled kontra l-faqar, tappoġġja r-riforma tas-servizz pubbliku u tindirizza t-tibdil fil-klima. Nafu li dan se jagħmel differenza u hu investiment fiċ-ċittadini u l-futur tal-Ewropa u huwa għalhekk li għandna naħdmu fil-fond biex nimminimizzaw it-tnaqqis u nintroduċu regoli sabiex il-politika ta’ koeżjoni ssir aktar effettiva. ” qal Karl-Heinz Lambertz , il-President tal-Kumitat Ewropew tar-Reġjuni.
B'referenza għan-negozjati baġitarji li ġejjin, id-Deputat Prim Ministru tar-Repubblika tal-Bulgarija, T omislav Donchev qal: " Il-Presidenza Bulgara ma toqgħodx lura milli ‘tpoġġi l-kwistjonijiet fuq il-mejda’ u tipprovoka diskussjoni sinċiera u onesta dwar il-futur komuni tagħna. Dan huwa validu wkoll għad-dibattitu dwar il-futur tal-Politika ta’ Koeżjoni – politika maħsuba biex tipprovdi tweġibiet għall-problemi tagħna, li twassalna lejn il-prosperità u valuri komuni. ”
Il-President ta’ NAMBR u s-Sindku ta’ Veliko Tarnovo, Daniel Panov , qal: " Aħna nemmnu li l-isforzi magħquda tal-membri tal-Kumitat tar-Reġjuni u l-appoġġ ta' assoċjazzjonijiet nazzjonali tal-awtoritajiet lokali minn madwar l-Ewropa huma prerekwiżiti għall-ħtiġijiet ta' miljuni ta’ ċittadini Ewropej li għandhom jintlaħqu għall-ġejjieni komuni tagħna. Il-prospett li r-riżorsi jiġu mmirata sew għall-komunitajiet lokali li qed jesperjenzaw diffikultajiet huwa l-għan u l-impenn politiku tagħna.”
Matul id-dibattitu, ir-relatur tal-KtR dwar il-QFP, Nikola Dobroslavić (PPE/HR) Prefett tal-Kontea ta’ Dubrovnik-Neretva, enfasizza li: " Il-mexxejja lokali jqisu l-proposta tal-QFP bħala punt ta' tluq pożittiv u jappoġġjaw iż-żieda fl-investiment fuq l-edukazzjoni, ir-riċerka, iż-żgħażagħ u l-migrazzjoni. Iżda t-tnaqqis previst għall-politika ta’ koeżjoni fir-riskju li jillimita l-kapaċità tar-reġjuni u l-bliet biex jiġu indirizzati l-inugwaljanzi u jagħtu spinta lill-innovazzjoni madwar il-kontinent filwaqt li l-kriterji ta’ allokazzjoni tal-fondi proposti u ż-żieda fil-flessibilità tal-baġit iridu jiġu valutati bir-reqqa. ”
Iċ-ċentralizzazzjoni tal-investiment u s-separazzjoni li qed tikber tal-fondi strutturali tal-UE, bil-Fondi Soċjali Ewropej u l-Fond għall-Iżvilupp Rurali dejjem iżjed distakkati mill-Fond Ewropew għall-Iżvilupp Reġjonali u l-Fond ta’ Koeżjoni, ħarġu bħala tħassib ewlieni tal-mexxejja lokali.
IL-ĦIDMA TAL-KTR DWAR IL-POLITIKA TA’ KOEŻJONI FUTURA
Il-Kummissjoni COTER tal-KtR qed twettaq valutazzjoni fil-fond tar-regolamenti l-ġodda. Il-Kumitat se jfassal u jadotta l-proposti tiegħu għal titjib sa Frar. Flimkien mal-opinjoni dwar il-QFP immexxija mis-Sur Dobroslavić, opinjonijiet ippjanati jinkludu:
- Regolament dwar Dispożizzjonijiet Komuni, korelaturi Catiuscia Marini (PSE/IT), President tar-Reġjun tal-Umbria, Michael Schneider (PPE/DE), Segretarju tal-Istat tal-Land ta’ Saxony-Anhalt.
- Il-Fond Ewropew għall-Iżvilupp Reġjonali: Michiel Rijsberman (PPE/NL), Membru tal-Kunsill Eżekuttiv tal-Provinċja ta’ Flevoland.
- Il-Kooperazzjoni Territorjali Ewropea: Marie-Antoinette Maupertuis , Membru eżekuttiv tal-awtorità reġjonali tal-Korsika.
- Kooperazzjoni Transfruntiera: Bouke Arends (PSE/NL), Membru tal-Kunsill Muniċipali ta’ Emmen
- Il-Fond Soċjali Ewropew Plus: Susana Diaz (PPE/ES), President ta’ Andalucia.
- Il-Faċilità Nikkollegaw l-Ewropa: Isabelle Boudineau, Viċi President tal-Kunsill Reġjonali ta’ Nouvelle-Aquitaine
ALLEANZA TA’ KOEŻJONI
Sabiex jippreżenta l-każ għal politika ta’ koeżjoni aktar b’saħħitha wara l-2020, il-KtR, flimkien mal-assoċjazzjonijiet territorjali ewlenin tal-UE, nedew il-#CohesionAlliance: moviment li jinvolvi liċ-ċittadini miftuħ għal kull min jemmen li l-politika ta’ koeżjoni tal-UE trid tkompli tkun pilastru tal-futur tal-UE. Minn meta tnediet f’Ottubru tas-sena l-oħra, l-Alleanza kompliet tattira firmatarji ġodda kuljum, inklużi l-awtoritajiet reġjonali u lokali, l-assoċjazzjonijiet tan-negozji, l-akkademja, it-trejdjunjins u l-gruppi ta’ riflessjoni.
Aktar informazzjoni dwar l-inizjattivi, id-dikjarazzjonijiet u d-dokumenti ta’ pożizzjoni relatati ma’ #CohesionAlliance hija disponibbli fuq https://cohesionalliance.eu .
Kuntatt:
Pierluigi Boda
Tel: +32 2 282 2461
Mowbajl: +32 473 85 17 43
pierluigi.boda@cor.europa.eu