Biex tintlaħaq tranżizzjoni diġitali inklużiva fiż-żoni urbani u rurali jeħtieġ li jkun hemm aktar investiment fl-infrastruttura tan-networks, strateġiji aġġornati ta’ reżiljenza diġitali, u kooperazzjoni aħjar mal-gvernijiet nazzjonali u bejn l-Istati Membri. Dawn kienu l-konklużjonijiet tad-dibattitu ma’ Margrethe Vestager, Viċi President Eżekuttiv tal-Kummissjoni Ewropea għal Ewropa Lesta għall-Era Diġitali, li sar matul is-sessjoni plenarja tat-8 ta’ Frar tal-Kumitat Ewropew tar-Reġjuni (KtR).

Fid-diskussjoni ma’ Margrethe Vestager, il-mexxejja reġjonali u lokali enfasizzaw li t-tħejjija tal-awtoritajiet lokali u reġjonali għall-Era Diġitali hija fattur ewlieni għas-sostenibbiltà tas-servizzi pubbliċi fl-era ta’ dipendenza dejjem akbar mit-teknoloġiji diġitali, il-cloud computing, u s-sistemi tad-data u informazzjoni interoperabbli. Li jiġi żgurat li ċ-ċittadini jkollhom aċċess għall-informazzjoni u l-għodod li għandhom bżonn huwa parti vitali mill-iżvilupp tas-soċjetà diġitali ta’ għada.

Il-President tal-Kumitat Ewropew tar-Reġjuni, Vasco Alves Cordeiro (PT/PSE), qal: “It-tranżizzjoni diġitali hija l-isfida l-kbira ta’ żmienna, iżda jibqa’ kruċjali li n-nies inressquhom fil-qalba tagħha biex nevitaw li jinħolqu distakki territorjali u inugwaljanzi soċjali ġodda. Fil-fehma tal-Kumitat tar-Reġjuni, l-Aġenda Diġitali tal-UE għandha tinbena flimkien mal-bliet u r-reġjuni, biex jinkisbu servizzi pubbliċi aħjar, jinħolqu impjiegi ġodda, u tiġi appoġġjata l-edukazzjoni, u għandha timxi id f’id mat-twettiq tal-Patt Ekoloġiku.”

Il-Viċi President Eżekuttiv Vestager enfasizzat li l-awtoritajiet lokali u reġjonali jaqdu rwol ewlieni biex it-teknoloġiji diġitali jsiru disponibbli għaċ-ċittadini kollha, u saħqet li s-servizzi pubbliċi diġitali għandhom jittejbu biex jiġu żgurati għodod sikuri u aċċessibbli. Il-membri tal-KtR enfasizzaw il-ħtieġa li l-mexxejja fis-settur pubbliku u privat jaħdmu flimkien biex jappoġġjaw id-diġitalizzazzjoni u l-innovazzjoni, u jikkontribwixxu għall-isforzi kontinwi fir-rigward tas-sigurtà tal-enerġija u t-teknoloġija ekoloġika sabiex tissaħħaħ l-awtonomija strateġika tal-UE. Tranżizzjoni doppja diġitali u ekoloġika inklużiva fiż-żoni urbani u rurali tintlaħaq biss jekk kulħadd ikollu aċċess għall-infrastruttura diġitali meħtieġa, u jekk kull reġjun ikollu għodod diġitali effettivi u innovattivi.

Id-distakk diġitali bejn iż-żoni urbani u rurali se jkompli jikber jekk ma jkunx hemm l-aċċess meħtieġ għall-internet u għas-servizzi diġitali f’oqsma ewlenin bħall-kura tas-saħħa, l-edukazzjoni, is-servizzi pubbliċi u l-inklużjoni soċjali. Dan jirrikjedi kooperazzjoni aktar b’saħħitha u aktar effettiva bejn l-amministrazzjonijiet pubbliċi tal-Istati Membri u fi ħdanhom. 

It-tranżizzjoni diġitali – it-titjib fl-aċċess għat-teknoloġiji diġitali u l-użu tagħhom u l-isfruttar tal-opportunitajiet sinifikanti li jistgħu jġibu magħhom – se jkollha impatt enormi fuq il-koeżjoni fl-UE u hija essenzjali biex jintlaħqu l-għanijiet tad-deċennju diġitali tal-2030. Fid-dawl ta’ dan, il-KtR qed ifittex li jżid id-dimensjoni diġitali mad-definizzjoni tal-koeżjoni ekonomika, soċjali u territorjali rikonoxxuta mit-Trattati tal-UE, sabiex l-investiment jiġi integrat fid-diġitalizzazzjoni “inklużiva”. F’era ta’ konnettività dejjem akbar, ħafna żoni urbani u rurali għad m’għandhomx in-networks avvanzati li jeħtieġu, u ċ-ċittadini spiss ma jkollhomx biżżejjed ħiliet diġitali. It-tnaqqis ta’ dan id-distakk diġitali jirrikjedi approċċ varjat, bi strateġiji ta’ trasformazzjoni diġitali adattati għall-ħtiġijiet ta’ kull reġjun biex jiġi żgurat li ħadd ma jitħalla jibqa’ lura.

Kuntest:

Studju li l-KtR se jippubblika dalwaqt se jinvestiga s-sitwazzjoni attwali tar-reżiljenza diġitali fost l-awtoritajiet lokali u reġjonali fl-UE u jeżamina s-soluzzjonijiet u l-fondi li qed jintużaw fil-livell sottonazzjonali biex tissaħħaħ din ir-reżiljenza. Tista’ ssib aktar informazzjoni hawnhekk.

Persuni ta’ kuntatt:

Monica Tiberi – Kelliema f’isem il-President‎Tel: +32 479 51 74 43‎monica.tiberi@cor.europa.eu

Theresa Sostmann

Tel. +32 475999415

Theresa.Sostmann@cor.europa.eu