Il-politika ta’ koeżjoni tal-UE trid tkompli tkompli tirrappreżenta tal-inqas terz tal-baġit tal-UE wara l-2020 u tappoġġa r-reġjuni kollha tal-Ewropa. Li titnaqqas joħloq riskji ta’ firdiet akbar fl-Ewropa u tista’ tipperikola l-ġejjieni tal-Unjoni Ewropea. Dan il-messaġġ ġie ppreżentat illum mill-#CohesionAlliance attiva madwar l-Ewropa kollha, lill-Kummissjoni Ewropea qabel il-pubblikazzjoni tal-abbozz tal-baġit futur tal-UE fit-2 ta’ Mejju.
B’valur ta’ aktar minn EUR 350 biljun bejn l-2014 u l-2020, il-politika ta’ koeżjoni – implimentata permezz tal- Fondi Strutturali u ta’ Investiment Ewropej – hija l-għodda prinċipali ta’ investiment tal-UE li taħdem biex tnaqqas id-disparitajiet reġjonali, toħloq l-impjiegi, tiftaħ opportunitajiet ġodda ta’ negozju u tindirizza kwistjonijiet globali kbar bħat-tibdil fil-klima u l-migrazzjoni. Din hija l-unika politika tal-UE li tkopri l-komunitajiet lokali kollha tal-Ewropa u li tinvolvi lill-partijiet interessati lokali biex iwettqu strateġiji ta’ tkabbir immexxi minn għanijiet komuni tal-UE.
Bħala konsegwenza tal-Brexit u l-ħtieġa biex l-UE tiffinanzja prijoritajiet ġodda bħad-difiża, is-sigurtà u l-kontroll tal-fruntieri esterni, l-allokazzjonijiet finanzjarji għall-politika tal-koeżjoni huma fil-periklu li jitnaqqsu fil-baġit fuq medda twila ta’ żmien li jmiss tal-UE – jew il- Qafas Finanzjarju Pluriennali – li jitabbilixxi l-limiti massimi tal-infiq tal-UE għall-perjodu wara l-2020. Sabiex dan jiġi evitat u titqajjem kuxjenza dwar ir-rwol essenzjali tal-politika ta’ koeżjoni, tnediet #CohesionAlliance inizjalment mill-assoċjazzjonijiet ewlenin tar-reġjuni u l-bliet – l- Assoċjazzjoni tar-Reġjuni Ewropej tal-Fruntiera (AEBR), l- Assemblea tar-Reġjuni Ewropej (AER), il- Konferenza ta’ Assemblej Leġislattivi Reġjonali Ewropej (CALRE), il- Kunsill tal-Muniċipalitajiet u r-Reġjuni Ewropej (CEMR), il- Konferenza tar-Reġjuni Marittimi Periferiċi tal-Ewropa (CPMR) u EUROCITIES - kif ukoll il- Kumitat Ewropew tar-Reġjuni f’Ottubru tas-sena l-oħra.
L-Alleanza qed titlob li l-baġit tal-UE wara l-2020 jagħmel il-politika ta’ koeżjoni aktar b’saħħitha, aktar effettiva, viżibbli u disponibbli għal kull reġjun fl-Unjoni Ewropea. Sa mit-tnedija tagħha, id- dikjarazzjoni tal-Alleanza ġiet iffirmata minn iktar minn 4,000 firmatarju, 100 reġjun, 70 belt u kontea, 50 assoċjazzjoni tal-gvernijiet reġjonali u lokali, 40 Membru tal-Parlament Ewropew, 30 assoċjazzjoni settorjali tal-UE.
“ Il-Politika ta’ Koeżjoni hija tradizzjonali iżda mhux antikwata. Huwa ser ikompli jaqdi r-rwol tiegħu fil-baġit li jmiss tal-UE. Ma nistgħux niggarantixxu l-ebda qtugħ fil-fondi iżda l-idea tagħna hi li nillimitawhom għal bejn 5 u 10%, ” qal il-Kummissarju tal-UE għall-Baġit Gunther Oettinger , u stieden lill-imsieħba kollha biex jimmobilizzaw u jikkonvinċu lill-gvernijiet nazzjonali li żieda limitata tal-kontribuzzjonijiet tal-Istati Membri hija meħtieġa biex l-UE tkun tista’ tlaħħaq mal-kompiti tagħha.
Il-Kummissarju għall-Politika Reġjonali tal-UE, Corinna Creţu, qablet ma’ dan il-punt u saħqet li: “L-Ewropa teħtieġ dejjem iktar koeżjoni, mhux biss għal raġunijiet ekonomiċi, iżda wkoll għal raġunijiet soċjali u politiċi. Grazzi għall-#CohesionAlliance eluf ta’ benefiċjarji ta’ din il-politika unika, li tirrappreżenta l-bliet u r-reġjuni kif ukoll is-saħħa, l-edukazzjoni jew setturi tan-negozju, iddikjaraw b’vuċi soda u mingħajr tlaqliq li l-Ewropa u l-politika ta’ koeżjoni huma żewġ naħat tal-istess munita.”
F’isem l-AEBR, id-Direttur Ġenerali għall-Azzjoni Esterna tal-Gvern Reġjonali ta’ Extremadura, Rosa Balas Torres, qalet: " Il-programmi ta’ kooperazzjoni territorjali attwali jridu jibqgħu partijiet inerenti tal-Koeżjoni Ewropea, u jressqu lejn xulxin dejjem iżjed iċ-ċittadini u t-territorji lil hinn mill-konfini nazzjonali. Wara l-Komunikazzjoni reċenti tal-Kummissjoni dwar ir-Reġjuni tal-Fruntiera, approċċi transnazzjonali u transkonfinali f’oqsma tal-politika cħrajn tal-UE, bħall-impjieg, il-kura tas-saħħa, l-aċċessibbiltà u l-konnettività għandhom jiġu żviluppati aktar ”.
Il-President tal-AER, u l-President tar-Reġjun ta’ Västra Götaland fl-Iżvezja, Magnus Berntsson qal: " Politika ta’ koeżjoni mġedda u b'saħħitha għar-reġjuni kollha hija l-investiment l-aktar intelliġenti u loġiku li l-UE tista’ tagħmel għall-futur tagħha. Fl-Unjoni tal-futur, il-politika ta’ koeżjoni hija l-aktar strument qawwi, l ttejjeb il-kwalità tal-ħajja taċ-ċittadini u tippromovi Ewropa magħquda, b’saħħitha u kompetittiva”.
Il-President tal-CALRE Ana Luís , President tal-Assemblea Leġislattiva tar-Reġjun Awtonomu tal-Azores fil-Portugall, irrimarkat li: "Wasal il-waqt li ningħaqdu u nikkonverġu għad-difiża tal-prinċipji fundamentali tal-Unjoni Ewropea, bħall-koeżjoni u s-solidarjetà. Din hija r-raġuni għaliex il-CALRE ssieħbet ma’ #CohesionAlliance mill-bidu nett. L-Ewropa għandha bżonn politika ta’ koeżjoni b’saħħitha u effiċjenti, f’kull wieħed mir-reġjuni tagħha”.
Il-kelliem tal-CEMR u Kunsillier ta’ Malmö fl-Iżvezja, Ilmar Reepalu , qal: “ Is-suċċess tal-prijoritajiet ġodda tal-UE, bħall-inklużjoni soċjali u l-azzjoni tal-kima, jiddipendi fuq il-kapaċità tal-bliet u r-reġjuni li jinvestu fit-territorji tagħhom. Dawn l-investimenti ma jistgħux iseħħu mingħajr il-politika ta’ koeżjoni. L-UE għandha tkun konsistenti u tagħmel il-politika ta’ koeżjoni b’saħħitha fil-baġit futur ”.
Il-President tal-KtR, Karl-Heinz Lambertz , saħaq li: " Jekk irridu Ewropa li tinvesti f’kull komunità, li hija iżjed effettiva, viżibbli u inqas ċentralizzata, u li tappoġġa l-kooperazzjoni lill hinn mill-fruntieri nazzjonali, neħtieġu politika ta’ koeżjoni b’saħħitha għar-reġjuni kollha u baġit tal-UE ikbar. Li tiġi mnaqqsa se jkollu konsegwenzi serji fuq il-prosperità u l-għaqda tal-Unjoni Ewropea fil-ġejjieni”.
Kwistjoni enfasizzata wkoll mill-President tas-CPMR u tal-Gvern Reġjonali Awtonomu tal-Azores tal-Portugall, Vasco Alves Cordeiro : “Il-baġit futur tal-UE jrid jirrifletti l-ambizzjoni u l-prijoritajiet tal-UE, jipprovdi lir-reġjuni bil-flessibilità li jeħtieġu biex iwasslu l-viżjoni politika tal-Unjoni Ewropea għall-ġejjieni tal-Ewropa fil-lokal. Ċerti prijoritajiet jistgħu jinkisbu biss permezz ta’ Politika ta’ Koeżjoni”.
Ir-rwol essenzjali tal-politika ta’ koeżjoni ġie enfasizzat mill-President ta’ EUROCITIES u Sindku ta’ Gent fil-Belġju, Daniël Termont : " Il-politika ta’ koeżjoni hija l-kolla li żżomm l-UE magħquda hekk kif naħdmu għal ġejjieni iktar sostenibbli, inklużiv, demokratiku u prosperuż. L-appoġġ għall-innovazzjoni, il-kooperazzjoni u s-solidarjetà permezz ta’ politika ta’ koeżjoni b’saħħitha se jgħin lill-Ewropa tibqa’ mudell għad-dinja ta’ madwarna għall-ġenerazzjonijiet li ġejjin ”.
Nota ta’ spjegazzjoni
Il-#CohesionAlliance hija koalizzjoni ta’ dawk li jemmnu li l-politika ta’ koeżjoni tal-UE għandha tkompli tkun pilastru fil-ġejjieni tal-UE. L-Alleanza nħolqot permezz ta’ kooperazzjoni bejn l-assoċjazzjonijiet prinċipali Ewropej tal-bliet u r-reġjuni u l-Kumitat Ewropew tar-Reġjuni. Hija titlob li l-baġit tal-UE wara l-2020 jagħmel il-politika ta’ koeżjoni aktar b’saħħitha, aktar effettiva, viżibbli u disponibbli għal kull reġjun fl-Unjoni Ewropea. Mill-gvernijiet nazzjonali, reġjonali u lokali sal-SMEs, l-NGOs, l-iskejjel, l-universitajiet, u l-organizzazzjonijiet kulturali, kull min jemmen fil-politika ta’ koeżjoni tal-UE huwa mistieden jissieħeb fil-#CohesionAlliance billi jiffirma d- dikjarazzjoni .
Aktar informazzjoni:
Ritratti
Skedi Informattivi dwar il-koeżjoni
Il-Firmatarji tal-Alleanza tal-Koeżjoni
Il-Mappa tal-Alleanza tal-Koeżjoni
Kuntatt għall-Istampa:
cohesionalliance@cor.europa.eu