Stqarrija tal-President tal-Kumitat Ewropew tar-Reġjuni, Apostolos Tzitzikostas, dwar il-miżuri proposti mill-Kummissjoni Ewropea fit-02/04/2020

Stqarrija tal-President tal-Kumitat Ewropew tar-Reġjuni, Apostolos Tzitzikostas, dwar il-miżuri proposti mill-Kummissjoni Ewropea fit-02/04/2020

“Illum il-Kummissjoni Ewropea ppreżentat sett ta’ miżuri li jirrispondu għas-sejħiet reċenti tal-Kumitat Ewropew tar-Reġjuni u ta’ ħafna awtoritajiet lokali u reġjonali, li qed jitolbu li jiġu appoġġjati aħjar l-isforzi tagħhom biex jindirizzaw il-konsegwenzi soċjali, ekonomiċi u tas-saħħa tal-kriżi.

L-iskema SURE tipprevedi miżuri konkreti biex tiżgura li l-ħaddiema jkomplu jirċievu s-salarju tagħhom u biex tgħin lill-kumpaniji jżommu l-impjiegi. Nittama li dan jgħin lill-komunitajiet lokali madwar l-Ewropa jtaffu l-impatt soċjali u ekonomiku tal-pandemija COVID-19. Huwa kruċjali wkoll li l-iskema l-ġdida tkun tista’ tipprovdi għajnuna lill-familji u lill-intraprendituri fir-reġjuni u l-bliet tagħna u li tippreserva l-kapaċità produttiva tal-ekonomiji reġjonali tagħna. Il-Kumitat tagħna huwa lest li jikkontribwixxi għal adozzjoni rapida tal-iskema, u se jiggarantixxi kontroll tar-realtà fuq il-post, biex jivvaluta kif dawn il-miżuri se jirrispondu għall-ħtiġijiet ta’ kuljum tal-komunitajiet lokali tagħna.

Nilqa’ l-proposta tal-Kummissjoni Ewropea li tuża l-marġini tal-baġit tal-UE biex tinvesti 3 biljun addizzjonali fis-settur tal-kura tas-saħħa permezz tal-Istrument għall-Appoġġ ta’ Emerġenza. Dan iwieġeb għall-appell tal-KtR għal Mekkaniżmu ta’ Emerġenza tas-Saħħa tal-UE ffinanzjat permezz ta’ flus li ma ntefqux fil-baġit tal-UE, kif spjegat fid-dettall fil-Pjan ta’ Azzjoni tal-KtR dwar il-Coronavirus. Dawn il-fondi se jippermettu lir-reġjuni u l-bliet tagħna jixtru provvisti vitali u tagħmir mediku, u biex jappoġġjaw aħjar il-ħidma tal-persunal mediku, soċjali u ta’ emerġenza li huma fl-ewwel linja fil-ġlieda kontra l-pandemija.

Illum il-Kummissjoni pproponiet ukoll dispożizzjonijiet sabiex tiżdied aktar il-flessibbiltà fl-użu tal-fondi ta’ koeżjoni u agrikoli, u biex jitħaffef l-intervent tagħhom biex jiġu appoġġjati l-miżuri ta’ emerġenza u l-irkupru ekonomiku. Bħala mexxejja reġjonali u lokali, nappoġġjaw l-isforzi tal-Kummissjoni li jippermettu riprogrammazzjoni rapida tal-investiment ippjanat qabel il-kriżi. Fl-istess ħin, nappella lill-Kummissjoni Ewropea tiggarantixxi li r-reġjuni jibqgħu atturi ewlenin fl-ippjanar u l-implimentazzjoni tal-miżuri. Il-koeżjoni u l-iżvilupp rurali joffru metodu ta’ ħidma uniku li jgħaqqad flimkien l-atturi tal-UE, dawk nazzjonali u dawk reġjonali/lokali. Huwa biss billi jsir użu sħiħ mill-esperjenza diretta tal-mexxejja reġjonali u lokali, li l-investiment tal-UE jista’ jintuża biex iwieġeb għall-ħtiġijiet tan-nies u n-negozji tagħna.”

Pjan ta’ Azzjoni tal-KtR biex ir-reġjuni u l-bliet jiġu megħjuna fil-ġlieda kontra l-COVID-19 fl-Unjoni Ewropea

Kelliem tal-President:

Michele Cercone

Tel. +32 (0)498 98 23 49

Michele.Cercone@cor.europa.eu