L-ajruporti reġjonali huma vitali għall-koeżjoni territorjali u essenzjali għal ħafna ekonomiji lokali
Peress li ħafna ajruporti reġjonali jinsabu f’diffikultà biex jirkupraw mit-tbatija ekonomika kkawżata mill-pandemija, il-membri tal-Kumitat Ewropew tar-Reġjuni adottaw Opinjoni fl-1 ta’ Lulju, li tistieden lill-Kummissjoni Ewropea tiżviluppa regoli aktar flessibbli u effiċjenti dwar l-għajnuna mill-Istat li jippermettu lill-Istati Membri jipprovdu l-appoġġ finanzjarju meħtieġ lill-ajruporti reġjonali. Fl- Opinjoni , li tfasslet minn Władysław Ortyl (PL/KRE), il-KtR enfasizza wkoll li l-appoġġ finanzjarju għandu jiġi investit biex l-ajruporti jsiru aktar sostenibbli sabiex jgħinu biex jintlaħqu l-objettivi stabbiliti fil-Patt Ekoloġiku Ewropew.
L-ajruporti reġjonali sabu ruħhom f’diffikultajiet ekonomiċi serji minħabba l-pandemija. It-traffiku tal-ajru intra-Ewropew naqas b’ 54% fl-2020 meta mqabbel mal-2019 u anke issa li r-restrizzjonijiet fuq l-ivvjaġġar qed jonqsu għas-sajf, it-traffiku għadu ’l bogħod mil-livelli ta’ qabel il-pandemija . F’Ottubru 2020, kważi 200 ajruport fl-Ewropa kienu qed jiffaċċjaw insolvenza . Il-falliment tagħhom ikollu impatt drammatiku fuq l-impjieg u l-ekonomiji tar-reġjuni fejn jinsabu dawn l-ajruporti u jkun ukoll daqqa ta’ ħarta kbira għall-konnettività ta’ ħafna reġjuni, speċjalment ir-reġjuni ultraperiferiċi jew inqas żviluppati fejn mhumiex disponibbli forom alternattivi ta’ trasport.
Władysław Ortyl (PL/KRE), relatur tal-Opinjoni u President tal-Provinċja ta’ Podkarpackie, qal: “ L-ajruporti reġjonali jaqdu rwol kruċjali għall-koeżjoni territorjali u ekonomika tal-UE – dawn jipprovdu konnettività għar-reġjuni li jservu u huma vitali għat-tkabbir ekonomiku. Mingħajr il-preżenza tagħhom, ħafna kumpaniji ma jinvestux f’reġjuni li mhumiex kapitali. Anke s-settur tat-turiżmu jiddependi ħafna minnhom. Neħtieġu sistema aktar flessibbli ta’ għajnuna mill-Istat biex tappoġġja l-irkupru tal-ajruporti reġjonali matul u wara l-pandemija. Fl-Opinjoni li ħejjejt enfasizzajt ukoll li l-maġġoranza tal-ajruporti reġjonali Ewropej jeħtieġu assistenza biex ikunu jistgħu jissopravivu fid-dawl tal-kriżi attwali.”
Fl-Opinjoni tiegħu, il-KtR jistieden lill-Kummissjoni Ewropea tgħin biex ittaffi t-tbatija finanzjarja li jiffaċċjaw l-ajruporti reġjonali u tiżviluppa regoli aktar flessibbli u aktar effettivi dwar l-għajnuna mill-Istat li jippermettu lill-Istati Membri jipprovdu assistenza finanzjarja lil ajruporti reġjonali li jinsabu f’reġjuni inqas żviluppati u ultraperiferiċi fejn ma jeżistux alternattivi aktar effiċjenti u sostenibbli. L-assistenza finanzjarja għandha tkun konformi mal-kundizzjonijiet stabbiliti fil- Fond Ewropew għall-Iżvilupp Reġjonali u l- Faċilità għall-Irkupru u r-Reżiljenza tal-UE. L-Istati Membri, flimkien mal-Kummissjoni Ewropea, għandhom ukoll jeżaminaw bir-reqqa l-possibbiltajiet ta’ appoġġ għall-ajruporti reġjonali fil-kuntest tal-pjani nazzjonali għall-irkupru u r-reżiljenza.
Fl-istess ħin, il-KtR jirrikonoxxi l-ħtieġa li l-ajruporti u l-avjazzjoni jsiru aktar sostenibbli, u għalhekk iħeġġeġ lill-Kummissjoni Ewropea biex talloka fondi Ewropej adegwati għad-diġitalizzazzjoni tal-ajruporti u l-iżvilupp ta’ teknoloġiji innovattivi. Il-KtR jinsisti wkoll li kundizzjoni għall-investimenti pubbliċi fl-ajruporti reġjonali għandha tkun li dawn jikkonformaw mal-objettivi tal-Patt Ekoloġiku Ewropew u l-prinċipju ta’ “l-ebda ħsara għall-ambjent”.
Informazzjoni ta’ sfond
L-akbar telf ta’ konnessjonijiet diretti minħabba l-pandemija ġie rreġistrat fl-ajruporti reġjonali iżgħar, partikolarment fit-titjiriet tal-passiġġieri. Skont Rapport dwar il-Konnettività tal-Industrija tal-Ajruporti , pereżempju, fi Treviso (l-Italja) intilfu 95% tal-konnessjonijiet, f’Vaasa (il-Finlandja) 91%, fi Quimper (Franza) 87% u f’Burgas (il-Bulgarija) 82%; madankollu, l-ajruporti ewlenin tal-merkanzija tal-Ewropa, eż. Liège (il-Belġju) kellhom żieda fit-titjiriet tal-merkanzija ta’ 10,7%.
Fit-30 ta’ Ġunju, il-membri tal-KtR adottaw Opinjoni dwar Strateġija għal Mobbiltà Intelliġenti u Sostenibbli. L-istrateġija tal-mobbiltà ġiet ippreżentata mill-Kummissjoni Ewropea fl-aħħar tas-sena li għaddiet u għandha l-għan li ssawwar mill-ġdid is-settur tat-trasport Ewropew, u tnaqqas l-emissjonijiet tiegħu b’90% sal-2050. L-istqarrija għall-istampa tal-KtR dwar l-Opinjoni tinsab hawnhekk .
Persuna ta’ kuntatt:
Tobias Kolonko
Tel. +32 22822003
tobias.kolonko@ext.cor.europa.eu