Bl-użu tal-motto '' Koeżjoni, valur Ewropew komuni ", ir-Rumanija se tmexxi l-Presidenza tal-UE matul sena deċiżiva għall-futur tal-Unjoni tagħna. Dan se jseħħ matul diskussjonijiet dwar il-baġit li jmiss tal-UE, fis-sena meta l-Parlament Ewropew li jmiss huwa mistenni li jiġi elett miċ-ċittadini mis-27, u mhux mit-28, Stat Membru. Kif xieraq, ir-Rumanija qiegħdet il-koeżjoni, il-kompetittività, it-tkabbir u l-valuri komuni fil-qalba tal-Presidenza tagħha. Jeħtieġ li nerġgħu nibnu l-UE fuq dawn il-prijoritajiet billi nqarrbuha lejn iċ-ċittadini tagħha. Dan nistgħu niksbuh biss flimkien, mill-bliet, ir-reġjuni, il-villaġġi u l-irħula tagħna u flimkien magħhom.

Jeħtieġ li kollha kemm aħna nsemmgħu leħinnha iktar dwar x’inhi l-UE u dak li tagħmel, filwaqt li nuru li l-koeżjoni u l-prosperità Ewropea jistgħu jinkisbu biss permezz tal-kooperazzjoni. L-UE teħtieġ li tkun aktar sensittiva għall-ħtiġijiet lokali u żżid l-impenn taċ-ċittadini ħalli t-tħassib tagħhom mhux talli jinstema’ iżda tittieħed azzjoni dwaru wkoll. Il-Kumitat tagħna qed jaħdem sabiex joħloq mod ġdid ħalli l-fehmiet taċ-ċittadini jsawru b’mod dirett id-deċiżjonijiet tal-UE fi sħubija mal-gvernijiet lokali u reġjonali.

Ewropa soċjali, koeżiva u inklużiva teħtieġ l-investiment. Il-Kumitat tagħna ġġieled bil-qawwa għall-ħarsien tal-investiment reġjonali - il-politika ta’ koeżjoni u l-iżvilupp rurali - sabiex kull reġjun, sinjur u fqir, jkun jista’ jgawdi. It-tnaqqis u ċ-ċentralizzazzjoni tal-fondi tal-UE se jfixklu l-kapaċità tar-reġjuni u l-bliet li jsaħħu l-kooperazzjoni territorjali, joħolqu l-impjiegi, jippromovu l-inklużjoni soċjali u juru l-valur miżjud tal-UE lill-komunitajiet tagħhom. 

Flimkien ma’ investiment sod, jeħtieġ li niżguraw li kull liġi tal-UE ttejjeb il-ħajja ta’ kuljum. Jeħtieġ li nsaħħu l-prinċipju tas-sussidjarjetà tal-UE - fejn id-deċiżjonijiet għandhom jittieħdu minn dawk li huma l-eqreb taċ-ċittadini. 70 % tal-liġijiet kollha tal-UE huma implimentati mill-gvernijiet lokali u reġjonali għalhekk dawn ikunu jeħtieġu inqas xogħol amministrattiv u aktar awtonomija. Jeħtieġu vuċi iktar b’saħħitha fl-UE sabiex din tal-aħħar tkun tista’ tilħaq l-għanijiet tagħha. Dan ma jfissirx anqas Ewropa b’inqas leġislazzjoni, iżda Ewropa aktar effettiva b’leġislazzjoni aħjar.

B’fondi suffiċjenti u b’liġijiet effettivi tal-UE, il-gvernijiet lokali u reġjonali jistgħu jikkontribwixxu għall-ġlieda kontra t-tibdil fil-klima. Huma l-bliet, ir-reġjuni u l-villaġġi li qed iwettqu ekoloġizzazzjoni tal-ekonomiji tagħna billi jnaqqsu t-tniġġis tal-arja u jagħmlu t-trasport tagħna sostenibbli, jaraw li d-djar tagħna qed jużaw l-enerġija b’mod effiċjenti u jirriċiklaw l-iskart. Il-ġlieda kontra t-tibdil fil-klima se tiġi miġġielda u mirbuħa fir-reġjuni u l-bliet tagħna.

Dawn il-punti jiffurmaw il-bażi tas-Summit tar-Reġjuni u l-Bliet fl-14-15 ta’ Marzu f’Bucharest. Flimkien mad-Delegazzjoni Rumena tagħna mmexxija mill-President Negoiță, u l-Presidenza Rumena tal-UE, is-Summit – intitolat "ReNew Europe" (Nġeddu l-Ewropa) – se juri li r-reġjuni u l-bliet huma fuq quddiem tal-implimentazzjoni tal-Għanijiet ta’ Żvilupp Sostenibbli, li għandhom isiru l-mudell ekonomiku globali fit-tul tal-UE. Id-Dikjarazzjoni tas-Summit se tkun il-messaġġ tal-gvernijiet reġjonali u lokali kollha tal-UE lill-gvernijiet nazzjonali tal-UE27, li juri li l-ġejjieni tal-Ewropa għandu bżonn lir-reġjuni u l-bliet tiegħu, u r-reġjuni u l-bliet jeħtieġu lill-Ewropa. Flimkien biss nistgħu noħolqu Ewropa taċ-ċittadini aktar magħquda.