Ikklikkja hawn biex tikseb traduzzjoni awtomatika tat-test ta’ hawn taħt.
L-ekonomija tal-pjattaformi: jinħtieġu regoli tal-UE jiżguraw kompetizzjoni ġusta u jiggarantixxu d-drittijiet tal-ħaddiema  

Il-mexxejja lokali u reġjonali ġibdu l-attenzjoni ta’ Nicolas Schmit, il-Kummissarju Ewropew il-ġdid għall-Impjiegi u d-Drittijiet Soċjali, li jeħtieġ li l-UE tistabbilixxi regoli ċari għall-ekonomija tal-pjattaformi biex jiġu garantiti d-drittijiet tal-ħaddiema u jiġu żgurati kundizzjoniiwt ekwi bejn l-attivitajiet ekonomiċi onlajn u offlajn fis-suq uniku.

Żewġ opinjonijiet adottati mill-Kumitat Ewropew tar-Reġjuni (KtR) illum jenfasizzaw li bosta regolamenti attwali tal-UE huma skaduti fid-dawl tal-iżvilupp ta’ mudelli kummerċjali ġodda u forom mhux standard ta’ impjieg li jinstabu ta’ spiss fil-pjattaformi diġitali. Dan japplika b’mod partikolari għall-implimentazzjoni tad- Direttiva dwar il-kummerċ elettroniku , li ilha sa mis-sena 2000, u li wasslet għal għadd ta’ kawżi quddiem il-qrati marbutin ma’ kumpaniji bħal Uber u Airbnb.

F’diskors matul is-sessjoni plenarja tal-Kumitat Ewropew tar-Reġjuni, fl-okkażjoni tal-ewwel intervent pubbliku tiegħu bħala Kummissarju għall-Impjiegi u d-Drittijiet Soċjali, Nicolas Schmit qal; “L-aġenda tal-Kummissjoni l-ġdida għandha l-għan li tindirizza l-isfidi kontinwi u l-opportunitajiet li jipprovdu d-dinja l-ġdida tax-xogħol, il-globalizzazzjoni, l-awtomatizzazzjoni, id-diġitalizzazzjoni u l-intelliġenza artifiċjali, flimkien mat-tranżizzjoni tagħna għal ekonomija newtrali f’termini ta’ emissjonijiet tal-karbonju. Jeħtieġ niżguraw li l-Ewropej kollha jibbenefikaw matul dit-tranżizzjoni, l-iżjed f’dak li jirrigwada l-impjiegi u l-għajxien tagħhom ta’ kuljum. Il-gvernijiet u l-amministrazzjonijiet reġjonali tagħna se jkunu strumentali biex jiżguraw li dan l-għan kondiviż isir realtà.”

Karl-Heinz Lambertz , President tal-Kumitat Ewropew tar-Reġjuni, qal: “Jeħtieġ li d-drittijiet soċjali jkunu fil-qalba tal-futur tal-UE, b’mod li jipproteġu lill-individwi u fl-istess ħin iħaddnu t-tibdil teknoloġiku. Jeħtieġ li l-UE tistabbilixxi pjan ċar li jiżgura li t-tibdil fl-industriji tagħna jevita li jkun hemm iżjed polarizzazzjoni fil-pagi u inugwaljanzi. Bis-saħħa tar-regolazzjoni adatta, ix-xogħol fuq pjattaforma huwa opportunità unika biex jiġi żgurat li kulħadd jibbenefika mid-diġitalizzazzjoni, u ħadd ma jitħalla jibqa’ lura.”

Iż-żewġ opinjonijiet jiffukaw fuq aspetti differenti tal-ekonomija kollaborattiva u x-xogħol fuq pjattaforma. L-ewwel waħda , li tħejjiet minn Dimitrios Birmpas (EL/PSE), Kunsillier Muniċipali ta’ Egaleo, tenfasizza li jinħtieġ qafas regolatorju komprensiv fil-livell tal-UE biex jiġu żgurati l-protezzjoni soċjali u d-drittijiet soċjali għall-ħaddiema fuq pjattaforma fil-konfront ta’ prattiki bħall-klassifikazzjoni żbaljata apposta tal-ħaddiema bħala persuni li jaħdmu għal rashom min-naħa tal-impjegaturi li jkunu qed ifittxu li jevitaw ir-regolamenti tal-impjieg, l-obbligi fiskali u l-ftehimiet kollettivi.

“Ix-xogħol fuq pjattaforma jipprovdi għadd ta’ opportunitajiet għas-suq tax-xogħol peress li huwa faċilment aċċessibbli u flessibbli. Madankollu, jeħtieġ li jiġu stabbiliti miżuri adatti biex jiġu żgurati kundizzjonijiet deċenti tax-xogħol għall-ħaddiema fuq pjattforma. Ir-regolamenti fundamentali tax-xogħol u r-regolamenti soċjali għandhom jiġu estiżi għall-ekonomija tal-pjattaformi u l-ħaddiema tagħha, li bosta minnhom huma żgħażagħ. Fid-dawl tan-natura transnazzjonali tal-ekonomija diġitali, jinħtieġ qafas Ewropew ċar biex jindirizza l-bosta sfidi regolatorji marbutin max-xogħol fuq pjattaforma, inkluż kif tiġi ddeterminata l-eżistenza ta’ relazzjoni tax-xogħol”, jargumenta r-relatur, li jilqa’ b’sodisfazzjon l-intenzjoni tal-Kummissarju Schmidt li jindirizza l-kundizzjonijiet tax-xogħol tal-ħaddiema fuq pjattaforma u forom ġodda ta’ prekarjetà.

It-tieni opinjoni titlob lill-UE tiddefinixxi biċ-ċar l-istatus tal-pjattaformi tal-ekonomija kollaborattiva, skont il-livell preċiż ta’ kontroll eżerċitat mill-pjattaforma, sabiex tiġi ċċarata l-kwistjoni ta’ liema regoli jirregolaw l-operazzjonijiet tagħhom. Barra minn hekk, peress li l-ekonomija kollaborattiva ċċajpar id-distinzjoni bejn l-atturi personali u professjonali, il-kunċett ta’ “provveditur tas-servizzi” għandu jiġi ċċarat permezz ta’ limiti fil-livell tal-UE. Ir-regolamenti l-ġodda tal-UE għandhom ukoll jesiġu li l-pjattaformi jipprovdu lill-awtoritajiet pubbliċi bid-data meħtieġa għall-infurzar tar-regoli u biex jiġi żgurat li l-fornituri tal-ekonomija kollaborattiva jħallsu s-sehem ġust tagħhom tat-taxxi.

Ir-relatur Peter Florianschütz (AT/PSE), Membru tal-Parlament Reġjonali ta’ Vjenna u tal-Kunsill tal-Belt ta’ Vjenna, qal: “Neħtieġu regoli ġusti u ċari fl-UR għall-pjattaformi diġitali. Jeħtieġ li r-regoli japplikaw għal kulħadd, u l-UE għandha tieħu ħsieb l-interessi taċ-ċittadini tagħha fil-bliet, il-komunitajiet u r-reġjuni. Bħalissa, għandna iżjed problemi milli soluzzjonijiet, li jkopru kwistjoniiet tat-taxxa, kiri fuq perjodu qasir ta’ żmien fis-settur tad-djar, u diffikultajiet fil-qasam tal-mobbiltà urbana u fl-isfera pubblika. Jeħtieġ li l-UE tagħti iżjed widen lill-bliet tagħha.”

L-opinjoni tesprimi wkoll tħassib dwar il-frammentazzjoni tas-suq uniku, peress li l-Istati Membri, ir-reġjuni u l-bliet stabbilixxew regoli differenti għall-atturi fis-suq tal-ekonomija kollaborattiva. Il-KtR jemmen li regoli armonizzati jippromovu t-tkabbir ta’ negozji iżgħar fil-qasam tal-ekonomija kollaborattiva fil-konfront ta’ pjattaformi multinazzjonali kbar li jeżistu diġà, li huma kapaċi jittrattaw aħjar il-kumplessità regolatorja.

Kuntatt:

Lauri Ouvinen

Tel. +32 22822063

lauri.ouvinen@cor.europa.eu

Ikkondividi :