Il-potenzjal tas-settur ferrovjarju fit-twettiq tal-prijoritajiet ta’ politika tal-UE huwa s-suġġett ewlieni u t-titolu tal-Opinjoni adottata mill-membri tal-Kumitat Ewropew tar-Reġjuni (KtR) matul is-sessjoni plenarja ta’ Diċembru. Pascal Mangin (FR/PPE), Kunsillier Reġjonali ta’ Grand Est, jenfasizza fl-Opinjoni tiegħu dwar modi biex is-settur tat-trasport isir aktar ekoloġiku billi jsir użu aħjar tat-trasport ferrovjarju u kif dan jista’ jikkontribwixxi għal koeżjoni ekonomika u soċjali akbar fir-reġjuni tal-Ewropa.

Il-Kummissjoni l-ġdida poġġiet id-dekarbonizzazzjoni u l-mitigazzjoni tat-tibdil fil-klima fuq nett tal-prijoritajiet politiċi tagħha, bħala parti mill-“Patt Ekoloġiku Ewropew”. Is-settur tat-trasport b’mod ġenerali huwa responsabbli għal madwar 27 % tal-emissjonijiet ta’ gassijiet serra fl-UE. Is-settur ferrovjarju għandu waħda mill-aktar rati baxxi ta’ emissjonijiet mill-modi tat-trasport kollha, u huwa wkoll l-uniku settur li l-emissjonijiet ġenerali tiegħu qed jonqsu, minkejja ż-żieda fil-volumi tat-trasport. Il-linji ferrovjarji reġjonali u lokali b’mod partikolari għandhom il-potenzjal li jservu mhux biss id-dekarbonizzazzjoni u l-mitigazzjoni tat-tibdil fil-klima iżda wkoll biex jappoġġjaw prijoritajiet ta’ politika globali oħra tal-UE.

“ Il-ferroviji joffru taħlita tajba ta’ veloċità, sikurezza, kumdità, effiċjenza u prestazzjoni ambjentali. Madankollu s-settur ferrovjarju jirrappreżenta biss 12 % tat-trasport tal-merkanzija (50 % trasport bit-triq) u inqas minn 10 % tat-trasport tal-passiġġieri. Kwistjoni kbira hija li l-konnettività mhijiex distribwita b’mod ugwali fost ir-reġjuni tal-UE – anke jekk il-linji reġjonali sekondarji huma importanti ħafna għall-konnessjoni tar-rotot tat-trasport ewlenin maż-żoni rurali u r-reġjuni u t-territorji periferiċi tal-UE. L-istabbiliment tal-infrastruttura meħtieġa mhux biss se jgħaqqad aħjar il-bliet, ir-reġjuni periurbani u ż-żoni rurali, iżda wkoll se jnaqqas id-disparitajiet ekonomiċi u soċjali bejniethom, isaħħaħ is-suq intern u jtejjeb il-moviment liberu tal-persuni u l-merkanziji ”, qal Pascal Mangin (FR/PPE), relatur dwar “ Il-potenzjal tas-settur ferrovjarju fit-twettiq tal-prijoritajiet ta’ politika tal-UE ”.

Sabiex isseħħ il-bidla modali, jistgħu jiġu attivati għadd ta’ miżuri strateġiċi fil-livell tal-UE fil-kuntest tal-Patt Ekoloġiku Ewropew (il-prinċipju ta’ min iniġġes iħallas, sistemi ta’ tariffi aktar ibbilanċjati, investiment fid-diġitalizzazzjoni, eċċ.). B’mod parallel, is-settur ferrovjarju għandu jimpenja ruħu biex itejjeb aktar l-affidabbiltà, il-kumdità u l-affordabbiltà tal-ferroviji għall-passiġġieri u l-merkanzija. Is-settur ferrovjarju u l-awtoritajiet pubbliċi tal-UE għandhom jirriflettu wkoll dwar kif l-aħjar li tiġi ssodisfata d-domanda dejjem tikber għal tiġdid ta’ ferroviji ta’ billejl fl-UE hekk kif iċ-ċittadini qed ifittxu dejjem aktar soluzzjonijiet li jqisu l-kwistjonijiet relatati mal-klima għal vjaġġi fuq distanzi twal fl-Ewropa. L-awtoritajiet lokali u reġjonali għandhom rwol importanti x’jaqdu biex jixprunaw id-diskussjonijiet ma’ operaturi kemm pubbliċi kif ukoll privati dwar il-finanzjament u s-soluzzjonijiet li joffru alternattiva reali għal mezzi tat-trasport li jniġġsu aktar bi prezzijiet raġonevoli.

“ Is-settur ferrovjarju jeħtieġ li jinvesti fid-diġitalizzazzjoni, iċ-ċibersigurtà u s-servizzi minn bieb bieb li jindirizzaw l-ostakli tal-aħħar mil u jeħtieġ li nappoġġjawhom finanzjarjament kif ukoll permezz ta’ leġislazzjoni li tinċentiva l-bidla modali lejn forom ta’ trasport b’emissjonijiet baxxi. Eżempji jinkludu l-“internalizzazzjoni tal-ispejjeż esterni” bħat-tniġġis billi jiġi applikat il-prinċipju ta’ min iniġġes iħallas, rieżami tal-eżenzjonijiet attwali tal-VAT li huma applikati għal ċerti forom ta’ trasport transfruntier iżda mhux għall-ferroviji, u l-possibbiltà ta’ eżenzjoni ġenerali sħiħa għal investiment fi pjattaformi loġistiċi intermodali ”, tenna r-relatur Mangin .

Huwa appella wkoll għar-rikonoxximent tar-rwol speċjali tal-istazzjonijiet tal-passiġġieri bħala pjattaformi kulturali. “ L-istazzjonijiet tal-passiġġieri huma vetturi importanti tal-kultura b’sensibilizzazzjoni estensiva. B’mod partikolari fi bliet ta’ daqs medju u fi bliet żgħar, l-istazzjonijiet tal-passiġġieri huma riżorsa li ħafna drabi mhijiex sfruttata bħala ċentri kulturali alternattivi għal mużewijiet jew festivals ”, qal is-Sur Mangin . Huwa jissuġġerixxi wkoll li l-programm popolari #DiscoverEU u l-vjaġġi Interrail għandhom jiġu sfruttati aħjar permezz ta’ programm iddedikat ta’ avvenimenti fil-bliet u r-reġjuni tal-Ewropa li jiffukaw fuq l-istazzjonijiet lokali tal-ferrovija.

Kuntatt:

Carmen Schmidle

Tel. +32 (0)494 735787

carmen.schmidle@cor.europa.eu