Wara l-kriżi tal-COVID, iċ-ċittadini jistennew li l-UE tagħti tweġibiet effettivi: il-proġett “Ċentri Reġjonali 2.0” tal-Kumitat Ewropew tar-Reġjuni jgħin biex jiġi vvalutat kif l-UE tikseb ir-riżultati permezz ta’ network imġedded li jiġbor flimkien 46 membru, 10 osservaturi u korp assoċjat wieħed

Illum, il-Kumitat Ewropew tar-Reġjuni nieda ġenerazzjoni ġdida ta’ Ċentri Reġjonali biex jimmonitorjaw il-leġiżlazzjoni tal-UE fuq il-post u jiżguraw li l-vuċi ta’ mijiet ta’ partijiet interessati reġjonali u lokali titqies fl-evalwazzjoni tal-politika tal-UE. Iċ- ċentri l-ġodda jinkludu 46 membru, 10 osservaturi u korp assoċjat wieħed u huma stabbiliti bħala sottogrupp tal- Pjattaforma Fit For Future (F4F) tal-Kummissjoni Ewropea. Għal din it-tnedija attenda wkoll il-Viċi President għar-Relazzjonijiet Interistituzzjonali u l-Prospettiva Maroš Šefčovič . Din issegwi fażi pilota li tat prova tal-effettività tar-RegHubs fil-monitoraġġ tal-implimentazzjoni tal-leġiżlazzjoni f’ħames politiki tal-UE u fil-komunikazzjoni tas-sejbiet tagħhom permezz tal-KtR lura lill-Kummissjoni Ewropea, lill-Parlament Ewropew u lill-Kunsill.

Apostolos Tzitzikostas, , il-President tal-Kumitat Ewropew tar-Reġjuni, qal: “Nilqa’ bil-qalb il-ġenerazzjoni l-ġdida ta’ Ċentri Reġjonali. Il-punti ta’ kuntatt tar-RegHub urew li huma effiċjenti, b’mod uniku, biex iservu ta’ pont fil-konsultazzjoni bejn Brussell u r-reġjuni tagħna. Dawn jirċievu feedback direttament mingħand dawk li ta’ kuljum jesperjenzaw l-impatt tal-politiki tal-UE fuq ħajjet in-nies u jistgħu joffru lill-Kummissjoni Ewropea informazzjoni u kontribut imprezzabbli dwar kif tista’ tiżdied l-effettività tagħhom. Pereżempju, bis-saħħa tal-punti ta’ kuntatt tagħna, il-Kummissjoni se tkun tista’ tarrikkixxi l-evalwazzjoni tagħha tad-Direttivi dwar il-kura tas-saħħa transkonfinali billi tikseb għarfien dwar l-esperjenza tal-persunal tal-isptarijiet reġjonali mis-Slovenja tal-Lvant sa Alentejo.”

Il-Viċi President għar-Relazzjonijiet Interistituzzjonali u l-Prospettiva tal-Kummissjoni Ewropea, Maroš Šefčovič , li fetaħ l-avveniment tat-tnedija qal: “Huwa ta’ pjaċir għalija li nilqa’ r-RegHub 2.0 fil-pjattaforma l-ġdida Fit For Future, imfassla biex tissemplifika u timmodernizza l-liġijiet tal-UE, filwaqt li tnaqqas il-burokrazija. L-awtoritajiet reġjonali u lokali se jaqdu rwol ewlieni, minħabba l-perspettiva unika tagħhom ta’ dawk l-aktar affettwati b’mod dirett. Il-kontribut tagħhom dwar kwistjonijiet b’rabta mal-ippjanar u l-permessi tal-infrastruttura tas-seklu 21 se jkun ta’ importanza partikolari. Peress li qed infittxu li nagħtu spinta lill-ekonomija tal-Ewropa permezz ta’ investiment fl-infrastruttura ekoloġika, diġitali u anke medika, dan jista’ jkollu impatt reali fuq il-post.”

Michael Murphy (IE/PPE) , Membru tal-Kunsill tal-Kontea ta’ Tipperary u President tal-Kummissjoni għall-Politika Ekonomika ECON tal-KtR, qal: “Sa mill-ħolqien tiegħu sentejn ilu, ir-RegHub ġie ġestit mill-Kummissjoni ECON li qed nippresiedi. Ninsab kuntent ħafna li qed nara t-tnedija tar-RegHub 2.0 u dak li n-network kiseb sa issa. Id-diskussjonijiet tal-lum jikkonfermaw li regolamentazzjoni aħjar u tfassil ta’ politika bbażat fuq l-evidenza m’għandhomx ikunu biss kelmiet li jdoqqu għal widnejna mill-bużżieqa ta’ Brussell. Dawn għandhom ikunu fil-qalba tar-regoli tal-Ewropa u jqisu l-esperjenza tal-bliet u r-reġjuni tagħna. Kuntent li nista’ nikkontribwixxi għal dan l-isforz u nistenna bil-ħerqa l-ħidma li għandna quddiemna fix-xhur li ġejjin biex ngħinu dan il-għan jintlaħaq.”

Mark Speich (DE/PPE) , Segretarju tal-Istat għall-Affarijiet Federali, Ewropej u Internazzjonali (Nordrhein-Westfalen) – wieħed mir-reġjuni parteċipanti fin-network RegHub 2.0 – u President tal-Kummissjoni tal-KtR għaċ-Ċittadinanza, il-Governanza u l-Affarijiet Istituzzjonali u Esterni ( CIVEX ) stqarr: “Il-konsultazzjonijiet tan-Network RegHub jagħtu liċ-ċittadini, lill-kumpaniji, speċjalment lill-SMEs u lis-servizzi pubbliċi l-opportunità li jintroduċu l-esperjenzi tagħhom bl-implimentazzjoni tal-leġiżlazzjoni tal-UE. Dan ifisser ukoll li n-Network isaħħaħ il-vuċi taċ-ċittadini u tal-atturi ekonomiċi fil-livell tal-UE. Issa, in-Network RegHub ingħata rikonoxximent formali bħala parti mill-Pjattaforma Fit for Future tal-Kummissjoni Ewropea. B’konsegwenza ta’ dan, mhux biss in-network RegHub iżda ċ-ċittadini u l-atturi ekonomiċi kollha se jkollhom influwenza u impatt b’mod aktar dirett fuq il-leġiżlazzjoni Ewropea. Fl-istess ħin, il-konsultazzjonijiet tar-RegHub se jsaħħu u jkabbru l-bażi ta’ evidenza tal-opinjonijiet tal-Pjattaforma.”

Il-programm ta’ ħidma tal-ġenerazzjoni l-ġdida ta’ RegHub 2.0 u l-oqsma ta’ għarfien espert tiegħu se jiġu identifikati wara l-plenarja tal-pjattaforma F4F li se ssir fl-4 ta’ Marzu u se tidentifika l-politiki tal-UE li għandhom jiġu investigati.

Sfond:

 Dwar in- “Network ta’ Ċentri Reġjonali” (RegHub) : 70 % tal-leġiżlazzjoni tal-UE hija implimentata fil-livell lokali u reġjonali. Għaldaqstant, l-awtoritajiet lokali u reġjonali għandhom esperjenza siewja u diretta fl-applikazzjoni tal-leġiżlazzjoni f’kuntatt mill-qrib mal-intrapriżi lokali, l-imsieħba soċjali, is-soċjetà ċivili u ċ-ċittadini. Permezz tal-Opinjonijiet tiegħu, il-KtR jikkondividi b’mod formali l-pożizzjoni tal-awtoritajiet lokali u reġjonali dwar il-proposti leġiżlattivi tal-UE. Madankollu, hemm bżonn li jsir użu mill-għarfien tal-awtoritajiet lokali u reġjonali fi stadju aktar bikri tal-proċess leġiżlattiv tal-UE u li nibbenefikaw mill-esperjenzi tagħhom fl-implimentazzjoni tal-leġiżlazzjoni tal-UE. Ir-RegHub jissodisfa din il-ħtieġa billi jiġbor dan l-għarfien tekniku “fuq il-post” u jgħaddih lill-Kummissjoni Ewropea u liż-żewġ leġiżlaturi, sabiex iwassal informazzjoni dwar ir-reviżjonijiet, l-evalwazzjonijiet u l-kontrolli tal-idoneità tagħhom. Bħala l-vuċi istituzzjonali tar-reġjuni u l-bliet fl-UE, il-KtR jinsab f’pożizzjoni unika biex jiġbor flimkien il-kontributi tal-awtoritajiet lokali u reġjonali kollha għal dak il-għan. Huwa għal din ir-raġuni li fl-2019 il-KtR waqqaf proġett pilota li jikkonsisti f’network reġjonali għar-rieżami tal-implimentazzjoni politika tal-UE. L-inizjattiva ġiet aċċettata bħala waħda mir-rakkomandazzjonijiet tat- Task Force dwar is-Sussidjarjetà mwaqqfa mill-president tal-Kummissjoni Ewropea ta’ dak iż-żmien, matul l-ewwel nofs tal-2018. In-network jikkonsisti minn “punti ta’ kuntatt” iddedikati li huma membri tal-persunal ta’ amministrazzjoni lokali jew reġjonali li jiġbru feedback tekniku mill-partijiet interessati dwar l-esperjenza tagħhom ta’ implimentazzjoni “fuq il-post” tal-politiki eżistenti tal-UE. Għaldaqstant, in-network iżid il-perspettiva lokali u reġjonali fit-tfassil tal-politika tal-UE u jkabbar il-bażi ta’ evidenza tagħha.

 Dwar il- Pjattaforma Fit For Future (F4F) : Il-Kummissjoni Ewropea se tqis l-opinjonijiet tal-Pjattaforma biex tiżgura li l-liġijiet tal-UE jgħinu, u mhux ifixklu, lin-nies u lin-negozji, b’mod partikolari l-intrapriżi żgħar u ta’ daqs medju. Il-ħidma tal-Pjattaforma se tiffoka fuq suġġetti enfasizzati fi programm ta’ ħidma annwali. Għal kull suġġett, il-Pjattaforma se tiġbor l-evidenza minn diversi partijiet interessati pubbliċi u privati biex, potenzjalment, liġijiet speċifiċi tal-UE jiġu semplifikati u jitnaqqsu l-ispejjeż bla bżonn b’rabta magħhom, mingħajr ma tkun imminata l-kisba tal-għanijiet tagħhom. Wara, il-Pjattaforma se toħroġ opinjonijiet li jqisu l-opportunitajiet tad-diġitalizzazzjoni u d-densità leġiżlattiva. Dawn l-isforzi huma parti mill-aġenda għal Regolamentazzjoni Aħjar tal-Kummissjoni Ewropea. Il-Kumitat Ewropew tar-Reġjuni huwa parti mill-grupp tal-Gvern tal-Pjattaforma permezz ta’ tlieta mis-sitt presidenti tal-kummissjonijiet tal-KtR tiegħu, flimkien ma’ 27 rappreżentant tal-gvern mill-Istati Membri tal-UE.

Kuntatt:

Marie-Pierre Jouglain

Mobile: +32 (0)473 52 41 15

mariepierre.jouglain@cor.europa.eu