Il-Kumitat Ewropew tar-Reġjuni appella lill-Unjoni Ewropea biex teżenta temporanjament il-privattivi għall-vaċċini kontra l-virus COVID-19, sabiex jitrażżan it-tixrid rapidu tal-pandemija. Ħeġġeġ ukoll biex tiżdied il-produzzjoni fl-Ewropa u biex titħaffef il-kampanja ta’ tilqim fl-Ewropa.
Il-Kumitat – l-assemblea tal-UE tal-gvernijiet lokali u reġjonali – huwa l-ewwel istituzzjoni tal-UE li appellat għal eżenzjoni. Iż-żieda reċenti fl-infezzjonijiet f’kontinenti oħra żiedet il-pressjoni biex id-drittijiet tal-proprjetà intellettwali jiġu sospiżi fl-interess li tiġi massimizzata l-produzzjoni tal-vaċċini u jiġi żgurat aċċess ekwu għalihom.
Apostolos Tzitzikostas , President tal-Kumitat Ewropew tar-Reġjuni u Gvernatur tal-Maċedonja Ċentrali, qal: “Il-kura tas-saħħa bażika hija dritt fundamentali tal-bniedem, u din hija l-aktar theddida fundamentali għas-saħħa globali f’dawn l-aħħar deċennji. M’hemmx lok għan-nazzjonaliżmu fir-rigward tal-vaċċin u l-Unjoni Ewropea għandha tkompli tmexxi bl-eżempju, tipproteġi liċ-ċittadini kollha tagħha, u ma tħalli l-ebda reġjun, belt jew territorju jibqa’ lura. Bl-appoġġ tal-fondi tal-UE, ix-xjenzati, l-industrija u r-regolaturi għamlu biċċa xogħol eċċezzjonali biex isibu trattamenti effettivi daqshekk malajr. L-Unjoni Ewropea trid turi li s-solidarjetà u l-valuri tagħha huma ġenwini, filwaqt li tiżgura eżenzjoni temporanja mill-privattivi għall-vaċċini kontra l-COVID-19 u żżid il-produzzjoni tal-vaċċin biex tgħin lil kull komunità fid-dinja.”
Ximo Puig (ES/PSE), President tal-Gvern Reġjonali ta’ Valenzja, mexxa s-sejħa għas-sospensjoni tal-privattivi. Huwa u jitkellem fis-sessjoni plenarja tal-KtR, huwa qal: “Il-pandemija għadha magħna. Diġà qatlet aktar nies mill-battalji ta’ Verdun u ta’ Stalingrad. Biex intemmuha, se jkollna bżonn biljuni ta’ vaċċini fis-sena għall-popolazzjoni dinjija kollha. Huwa għalhekk li l-Ewropa għandha tiżgura li l-kumpaniji farmaċewtiċi l-kbar jissodisfaw l-impenji ta’ konsenja tagħhom. Neħtieġu kapaċità akbar għall-manifattura u l-konsenja tal-vaċċini. Għal dan il-għan, ipproponejt għażliet bħas-sospensjoni temporanja tal-privattivi, il-kumpens finanzjarju għal-laboratorji jekk tintgħażel l-għażla tal-liċenzjar obbligatorju, jew il-ħtieġa ta’ kooperazzjoni bejn il-kumpaniji biex tiżdied il-produzzjoni. Ma nistgħux inħassru dak li ġara fil-passat fil-kampijiet tal-battalja ta’ Stalingrad jew ta’ Verdun, iżda għad hemm żmien biex intaffu din it-traġedja umana.”
Il-proposta hija stabbilita f’Riżoluzzjoni – “dwar il-moviment liberu matul il-pandemija tal-COVID-19 (Ċertifikat Aħdar Diġitali) u ż-żieda fil-produzzjoni tal-vaċċini” – li ġiet diskussa fis-6 ta’ Mejju u adottata fis-7 ta’ Mejju. Ir-Riżoluzzjoni tiddikjara li “sabiex tiżdied il-produzzjoni tal-vaċċini, l-Unjoni Ewropea tista’ tesplora soluzzjonijiet ġodda bħas-sospensjoni temporanja tal-privattivi għall-mediċini u t-teknoloġiji mediċi għat-trattament jew il-prevenzjoni tal-infezzjonijiet tal-COVID-19”.
Fil-5 ta’ Mejju, l-Istati Uniti qalu li kienu se jibdew negozjati fl-Organizzazzjoni Dinjija tal-Kummerċ biex jillaxkaw ir-regoli dwar il-privattivi li jgawdu minnhom il-kumpaniji farmaċewtiċi. Fis-6 ta’ Mejju, Ursula von der Leyen, il-President tal-Kummissjoni Ewropea, qalet li l-Unjoni Ewropea hija “lesta tiddiskuti kwalunkwe proposta li tindirizza l-kriżi b’mod effettiv u prammatiku”.
F’Settembru li għadda, stħarriġ ikkummissjonat mill-Kumitat Ewropew tar-Reġjuni sab li l-Ewropej jafdaw lill-awtoritajiet reġjonali u lokali aktar milli jafdaw lill-UE jew lill-gvern nazzjonali tagħhom, u li l-qasam tas-saħħa huwa dak fejn l-Ewropej jixtiequ l-aktar li jaraw li l-awtoritajiet reġjonali u lokali jkollhom aktar influwenza fuq id-deċiżjonijiet meħuda fil-livell tal-UE.
Persuna ta’ kuntatt:
Andrew Gardner
Tel. +32 473 843 981
andrew.gardner@cor.europa.eu