Jeħtieġ li l-Unjoni Ewropea żżomm politika reġjonali b’saħħitha sabiex taqdi l-impenji internazzjonali tagħha biex jitnaqqsu l-emissjonijiet tal-karbonju, qal il-mexxej tal-politiċi lokali u reġjonali tal-UE fit-22 ta’ Frar.
Karl-Heinz Lambertz , President tal-Kumitat Ewropew tar-Reġjuni (KtR), kien qed jitkellem waqt ċelebrazzjoni tal-10 anniversarju tal- Patt Ewropew tas-Sindki dwar il-Klima u l-Enerġija , li, huwa qal, kien “qabeż l-aspettattivi kollha” u sar “storja ta’ suċċess Ewropea reali”. Il-Patt tas-Sindki ġie maħluq fl-Ewropa fl-2008 biex jappoġġa kwalunkwe belt jew reġjun li volontarjament ried jaqbeż il-mira għat-tnaqqis tal-emissjonijiet tal-UE. Dan sar inizjattiva globali fl-2016 meta ġie amalgamat mal-Compact of Mayors.
Waqt li tkellem fil-Parlament Ewropew flimkien mal-President tiegħu, Antonio Tajani, il-President Lambertz qal: “Għaxar snin ilu, ħadd ma kien jobsor li aktar minn 9,000 raħal u belt kienu ser jissieħbu għal dan il-moviment minn isfel għal fuq biex jiġi miġġieled it-tibdil fil-klima je w li jinxtered mad-dinja kollha. Iżda l-mexxejja lokali jifhmu li l-ekoloġizzazzjoni tal-ekonomiji tagħna, it-tindif tal-arja tagħna u l-iżgurar ta’ provvista sostenibbli ta’ ikel tas-saħħa jtejjeb il-ħajja taċ-ċittadini tagħna. Il-bliet u r-reġjuni huma t-tweġiba għall-isfida tal-klima u l-enerġija u qegħdin imexxu huma. Il-gvernijiet nazzjonali jeħtieġu jirrikonoxxu dan b’mod formali billi jagħtu lill-bliet u r-reġjuni l-opportunità formali li jipparteċipaw f’diskussjonijiet globali dwar it-tibdil fil-klima.”
Fl-avveniment, li sar ġurnata qabel ma ltaqgħu l-mexxejja tal-UE biex jiddiskutu l-baġit tal-UE li jmiss, President Lambertz żied jgħid: "Jekk l-Ewropa tkompli tkun fuq quddiem tal-kwistjoni globali dwar il-klima, jekk għandna nagħmlu lill-Ewropa ekoloġika mill-ġdid, hija għandha tiżgura li l-mexxejja lokali u reġjonali għandhom il-fondi suffiċjenti. Dan ifisser li jiġi żgurat li l- politika ta’ koeżjoni tal-UE - li attwalment torbot aktar minn 25 % tal-baġit tagħha għall-azzjoni dwar il-klima - tibqa’ b’saħħitha u effettiva. Il-politika ta’ koeżjoni tiffinanzja l-pjanijiet ta’ azzjoni dwar il-klima u l-enerġija lokali, tinvesti fl-effiċjenza enerġetika, l-enerġija rinnovabbli u t-trasport pubbliku sostenibbli fir-reġjuni u l-bliet tagħna. Li tiddgħajjef il-politika ta’ koeżjoni jkollha riperkussjonijiet gravi fuq il-kapaċità tagħna biex noħolqu impjiegi ekoloġiċi, innaqsu l-emissjonijiet tagħna tal-karbonju u nimxu lejn ekonomija b’livell baxx ta’ karbonju.”
Huwa ħeġġeġ lis-sostenituri tal-azzjoni dwar il-klima biex jirsistu li l-politika ta’ koeżjoni tal-UE tkun b’saħħitha, aktar effettiva, viżibbli u disponibbli għal kull reġjun u belt fl-UE wara l-2020. Il-Kumitat – l-assemblea tal-UE ta’ 350 mexxej lokali u reġjonali - issottometta rakkomandazzjonijiet estensivi dwar kif għandha tittejjeb il-politika. Flimkien ma’ assoċjazzjonijiet Ewropej ewlenin tar-reġjuni u l-bliet, huwa nieda wkoll il-#CohesionAlliance, koalizzjoni ta’ dawk li jemmnu li l-politika ta’ koeżjoni tal-UE għandha tibqa’ pilastru futur tal-UE. Dan kien ukoll il-messaġġ ewlieni tal-President Lambertz f’ittra mibgħuta lil Donald Tusk, President tal-Kunsill Ewropew, fil-21 ta’ Frar, li fiha huwa talab ukoll li l-baġit tal-UE “jiżdied għal 1.3 % tad-dħul gross nazzjonali tal-UE27”.
Noti lill-edituri:
• Kelliema waqt iċ-ċerimonja biex timmarka għaxar snin ta’ Patt Ewropew tas-Sindki dwar il-Klima u l-Enerġija kienu jinkludu lis-sindki minn madwar l-Ewropa u tliet Kummissarji Ewropej, il-Viċi President Maroš Šefčovič, il-Kummissarju Miguel Arias Cañete, u l-Kummissarju Carlos Moedas. Il-Kummissjoni Ewropea tiffinanzja l-Patt Ewropew tas-Sindki dwar il-Klima u l-Enerġija.
• Minbarra l-President Lambertz, tkellmu tliet membri oħra: is-Sur Fernando López Miras (ES/PPE), President tar-reġjun ta’ Murcia; is-Sur Juan Espadas Cejas (ES/PSE), is-Sindku ta’ Seville; u s-Sur Andrea Turčanová (SK/PPE), is-Sindku ta’ Prešov. Il-KtR, il-patrun politiku tal-Patt tas-Sindki, ikkontribwixxa għad-dibattitu dwar il-globalizzazzjoni tal-moviment bir-rakkomandazzjonijiet fl-2015. Ir-relatur kien: Kata Tüttő (HU/PSE)
• Fl-Ewropa, il-firmatarji tal-Patt tas-Sindki naqqsu l-emissjonijiet tagħhom b’madwar 23 % meta mqabbla mal-livelli tal-1990. Dan jitqabbel mal-għan ġenerali tal-UE ta’ tnaqqis ta’ 20 % sa l-2020.
• L-UE għandha l-għan li tonfoq tal-anqas 20 % tal-baġit tagħha għall-azzjoni dwar il-klima. Iċ-ċifri tal-Kummissjoni Ewropea mill-2017 jindikaw li aktar minn 25% tal-fondi mill-politika ta’ koeżjoni ġie dirett lejn proġetti relatati mal-klima sa mill-2014. Minn EUR73 biljun li ntefqu sa dak il-punt sa mill-2014, EUR 22 biljun ġew investiti fil-protezzjoni tal-ambjent, EUR16.5 biljun fl-adattament tat-tibdil fil-klima u proġetti għall-prevenzjoni tar-riskju, EUR 15.5 biljun f’netwerks tat-trasport u l-enerġija, u EUR 11 biljun f’azzjonijiet – bħall-effiċjenza enerġetika – sabiex tiġi appoġġata ekonomija b’emissjonijiet baxxi tal-karbonju. Il-kontribuzzjoni tal-Fondi ta’ Koeżjoni Ewropea biex jintlaħqu l-objettivi maqbula dwar il-klima f’Pariġi fl-2015 kienet is-suġġett ta’ studju tal-Parlament Ewropew fl-2017.
• Ir-ritratti huma disponibbli fuqFlickr.
Kuntatt:
Andrew Gardner
Tel. +32 473 843 981
andrew.gardner@cor.europa.eu