Il- #Cohesion Alliance – alleanza fl-UE kollha ta’ 12 000 firmatarju li titlob politika ta’ koeżjoni aktar b’saħħitha wara l-2020 – tilqa’ l-proposti riveduti tal-Kummissjoni Ewropea tal-baġit u l-Pjan ta’ Rkupru tal-UE għall-2021–2027, inkluża l-estensjoni tal-programmi ta’ koeżjoni attwali b’aktar flessibbiltà u finanzjament addizzjonali. Madankollu, l-Alleanza tħeġġeġ lill-Kummissjoni Ewropea u lill-Istati Membri jiżguraw l-involviment tal-bliet, il-muniċipalitajiet u r-reġjuni u jibqgħu jagħmlu enfasi qawwija fuq il-koeżjoni fil-miżuri kollha ta’ rkupru, immirati lejn il-bini mill-ġdid tal-ekonomija, it-trawwim tas-sostenibbiltà u t-tisħiħ tan-nisġa territorjali u soċjali tal-Unjoni tagħna, inkluż fil-proċess tas-Semestru Ewropew.
Il-Qafas Finanzjarju Pluriennali (QFP) tal-UE u l-Pjan ta’ Rkupru jridu jiffukaw fuq il-koeżjoni bħala valur fundamentali tal-Unjoni Ewropea, biex jiffaċċjaw sfidi kbar bħalma huma l-Patt Ekoloġiku Ewropew, l-Għanijiet ta’ Żvilupp Sostenibbli, il-Pilastru Ewropew tad-Drittijiet Soċjali kif ukoll it-trasformazzjoni diġitali. Fil-kriżi attwali, il-bliet, il-muniċipalitajiet u r-reġjuni jeħtieġu l-appoġġ dirett ta’ politika ta’ koeżjoni b’saħħitha aktar minn qatt qabel biex jipprevjenu ż-żieda fl-inugwaljanzi territorjali u l-irkupru asimmetriku peress li l-Istati Membri għandhom mezzi finanzjarji differenti biex jindirizzaw l-isfidi ekonomiċi u soċjali attwali.
Il-#CohesionAlliance tilqa’ l-proposta tal-Kummissjoni Ewropea biex jiġi żgurat ir-rwol tal-politika ta’ koeżjoni bħala politika tal-UE b’saħħitha ta’ investiment fit-tul, kif ukoll l-investiment ta’ EUR 55 biljun (prezzijiet tal-2018) permezz ta’ REACT-EU biex jiġi pprovdut rispons effettiv għall-pandemija tal-COVID-19 u l-konsegwenzi soċjali u ekonomiċi tagħha. L-estensjoni tal-Programmi Operattivi attwali se tippermetti implimentazzjoni rapida ta’ investiment kruċjali. Barra minn hekk, iż-żieda fil-flessibbiltà għat-trasferiment tar-riżorsi bejn il-fondi u t-twessigħ tal-kamp ta’ applikazzjoni biex jiġu appoġġjati s-servizzi tas-saħħa, it-turiżmu u s-setturi kulturali kif ukoll biex jiġi pprovdut kapital operattiv lill-SMEs se jgħinu lill-gvernijiet lokali u reġjonali jinvestu l-flus fejn huma l-aktar meħtieġa, dment li dan jirrispetta bis-sħiħ il-prinċipji ewlenin tal-koeżjoni.
Madankollu, l-Alleanza hija mħassba li jekk ma jitqisux il-ħtiġijiet diversi tar-reġjuni, il-bliet u l-muniċipalitajiet u mingħajr l-involviment qawwi tal-atturi lokali, il-Faċilità għall-Irkupru u r-Reżiljenza – li hija l-aktar għodda b’saħħitha ta’ investiment tal-pjani ta’ rkupru tal-UE – tinsab fil-periklu ta’ falliment. Għalissa, il-biċċa l-kbira tal-miżuri huma diretti biss lejn l-Istati Membri, mingħajr ma hu ċċarat kemm se jkollhom sehem l-awtoritajiet lokali u reġjonali fir-reviżjoni tal-programmi u fl-infiq tar-riżorsi. Ir-rabta b’saħħitha tal-Faċilità għas-Semestru Ewropew u għar-rakkomandazzjonijiet speċifiċi għall-pajjiżi tista’ twassal għal ċentralizzazzjoni ulterjuri tal-pjani ta’ rkupru. L-Alleanza tħeġġeġ lill-istituzzjonijiet tal-UE u dawk nazzjonali kollha – u b’mod partikolari lill-Kummissarju tal-UE għall-Koeżjoni u r-Riformi, Elisa Ferreira – biex jieħdu l-passi meħtieġa u jiżguraw li l-pjani nazzjonali għall-irkupru u r-reżiljenza jikkonformaw mal-prinċipju tas-sħubija, iwieġbu għall-ħtiġijiet reali taċ-ċittadini u tan-negozji u jippermettu involviment aktar b’saħħtu u aktar strutturat tal-awtoritajiet lokali u reġjonali.
L-organizzazzjonijiet imsieħba tal-#CohesionAlliance ressqu l-prijoritajiet tagħhom f’ abbozz ta’ dikjarazzjoni ġdid li jafferma l-koeżjoni bħala valur fundamentali tal-Unjoni Ewropea u għan ewlieni għall-politiki u l-investiment kollha tagħha. L-imsieħba tal-Alleanza ta’ Koeżjoni 2.0 se jniedu d-dikjarazzjoni l-ġdida matul il-laqgħa li jmiss fil-bidu ta’ Ġunju.
Ikkuntattja lis-segretarjat:
CohesionAlliance@cor.europa.eu