Vitaliy Klitschko, President tal-Assoċjazzjoni tal-Bliet Ukreni u Sindku ta’ Kiev, ħa sehem fil-laqgħa tal-Kumitat Ewropew tar-Reġjuni fi Praga biex juri l-apprezzament tiegħu għall-isforzi tal-Kumitat u l-Presidenza Ċeka tal-UE għar-rikostruzzjoni tal-Ukrajna.

Il-Kumitat Ewropew tar-Reġjuni joffri l-appoġġ sħiħ u qawwi tiegħu għall-bliet u r-reġjuni Ukreni, qal il-President tiegħu, Vasco Cordeiro, fis-16 ta’ Settembru, fejn żied jgħid li r-reġjuni u l-bliet tal-UE ser ikomplu jappoġġjaw lill-awtoritajiet lokali u reġjonali Ukreni fit-tul.

Id-dikjarazzjonijiet saru waqt laqgħa tal-Kumitat Ewropew tar-Reġjuni fi Praga, ospitata f’kooperazzjoni mal-Presidenza Ċeka tal-UE u li fiha pparteċipaw ukoll il-Viċi Prim Ministru Ċek Ivan Bartoš u s-Sindku ta’ Praga, Zdeněk Hřib, membru tal-KtR. Il-membri ddiskutew il-konsegwenzi tal-gwerra kontra l-Ukrajna għan-nies fl-Unjoni Ewropea, u anke kif Alleanza li għadha kif inħolqot tal-Bliet u r-Reġjuni għar-Rikostruzzjoni tal-Ukrajna tista’ tappoġġja lill-komunitajiet lokali tal-Ukrajna hekk kif jippruvaw jiffaċċjaw l-effetti tal-invażjoni tar-Russja.

Vasco Alves Cordeiro, President tal-Kumitat Ewropew tar-Reġjuni, qal: “Huwa unur għall-Kumitat Ewropew tar-Reġjuni li jilqa’ lil Vitaliy Klitschko, President tal-Assoċjazzjoni tal-Bliet Ukreni u Sindku ta’ Kiev. Ma nistax nissottolinja biżżejjed l-appoġġ sinċier, b’saħħtu u mingħajr kundizzjonijiet tagħna lir-rappreżentanti lokali u reġjonali tal-Ukrajna u lill-popolazzjoni kollha fil-ġlieda kontra t-tirannija u għall-valuri li lkoll naqsmu. Nagħtuh is-sħubija onorarja tal-Kumitat mhux bħala simbolu, iżda bħala dikjarazzjoni tal-impenn tagħna lejn ir-reġjuni u l-bliet Ukreni. Ninsabu grati lejn il-Presidenza Ċeka għall-appoġġ u t-tmexxija tagħhom fit-tiswir ta’ soluzzjonijiet Ewropej. Jeħtieġ li naħdmu b’mod rapidu biex niżguraw li x-xitwa ma tpoġġix f’riskju is-solidarjetà Ewropea. Ir-reġjuni u l-bliet qed jagħmlu l-parti tagħhom u r-rwol tagħhom għandu jiġi rikonoxxut”. Wara stedina mis-Sindku Klitschko u l-Ministru għall-Komunitajiet u t-Territorji tal-Ukrajna Oleksiy Chernyshov, il-President Cordeiro ħabbar li ser jivvjaġġa lejn Kiev biex juri solidarjetà.

F’isem il-Presidenza Ċeka tal-UE, Ivan Bartoš, Viċi Prim Ministru tar-Repubblika Ċeka, qal: “Huwa ovvju li l-aktar kwistjoni urġenti għall-Ewropa kollha hija l-kriżi tal-enerġija u l-impatti tal-gwerra fl-Ukrajna. Ninsab totalment konvint li l-uniku mod biex jirnexxielna noħorġu minn din is-sitwazzjoni huwa l-kooperazzjoni Ewropea mill-qrib fl-UE u ma’ pajjiżi terzi. Għalhekk għandi l-unur li nospita l-laqgħa tal-Bureau tal-Kumitat Ewropew tar-Reġjuni bil-għan li nfittxu soluzzjonijiet possibbli kif niffaċċjaw l-isfidi komuni tagħna, peress li aħna msieħba. L-istabbiltà u l-prosperità mġedda – dawk huma l-għanijiet strateġiċi tagħna.”

Vitaliy Klitschko, President tal-Assoċjazzjoni tal-Bliet Ukreni u Sindku ta’ Kiev, qal: “Ninsabu grati ħafna lejn l-imsieħba u l-ħbieb kollha tagħna li qed jgħinu lill-Ukrajna. U huwa tajjeb li tifhmu: l-Ukrajna mhux qed tiġġieled biss għall-istat u l-libertà tagħha. Illum, qed niddefendu l-istabbiltà u l-paċi fl-Ewropa kollha. U dan qed jiswa ħafna. Fil-futur, il-kooperazzjoni tagħna magħkom għandha tkun aktar sistematika, aktar effettiva – b’mod partikolari, fl-assistenza biex jiġu rrestawrati il-bliet u l-irħula Ukreni, id-djar tar-residenti tagħhom, u l-infrastruttura.”

Apostolos Tzitzikostas, l-ewwel Viċi President tal-KtR u l-Gvernatur tal-Maċedonja Ċentrali, qal: “Ir-reġjuni u l-bliet fl-Ewropa ilhom jgħinu lil xulxin għal għexieren ta’ snin, min-naħa għall-oħra tal-fruntieri. Iżda qatt qabel forsi ma kien hemm ħtieġa daqshekk kbira u f’daqqa għas-solidarjetà. Nistgħu ngħinu lill-Ukrajna terġa’ tinbena minn isfel għal fuq.”

Il-Kumitat Ewropew tar-Reġjuni nieda Alleanza tal-Bliet u r-Reġjuni għar-Rikostruzzjoni tal-Ukrajna f’Ġunju, bi tweġiba għal talba mill-President Volodymyr Zelenskyy, u bl-appoġġ tal-Presidenti tal-Kunsill Ewropew u tal-Kummissjoni Ewropea. L-Assoċjazzjoni tal-Bliet Ukreni hija msieħba tal-Alleanza. L-Alleanza attirat appoġġ ġdid sinifikanti fis-16 ta’ Settembru, meta l-Patt ta’ Bliet Ħielsa – iffurmat fl-2020 mis-Sindki ta’ Praga, Bratislava, Budapest, u Varsavja – ingħaqad formalment mal-Alleanza.

L-Alleanza se tifforma parti minn pjattaforma emerġenti tal-UE li se tikkoordina l-isforzi ta’ rikostruzzjoni għall-Ukrajna, inkluż l-appoġġ għall-ħidma tal-amministrazzjonijiet lokali u reġjonali. Is-Sindku Klitschko kellu rwol kritiku biex jipprova jsarraf espressjonijiet ta’ rieda tajba mill-bliet u r-reġjuni madwar id-dinja f’appoġġ prattiku.

Is-Sindku Klitschko ilu jaħdem mal-Kumitat Ewropew tar-Reġjuni għal diversi snin, l-aktar reċenti permezz tal-Grupp ta’ Ħidma tal-Kumitat dwar l-Ukrajna, u f’Marzu l-KtR ħatru bħala l-ewwel membru onorarju tiegħu. Iż-żjara tas-Sindku Klitschko fi Praga pprovdiet lill-Kumitat bl-ewwel opportunità tiegħu li jagħtih l-unur personalment.

Noti lill-edituri:

• Konferenza stampa: disponibbli fuq talba minn Europe by Satellite
• Komunikazzjoni tal-Kummissjoni Ewropea dwar L-għajnuna lill-Ukrajna u r-rikostruzzjoni tagħha (18 ta’ Mejju).
• Stqarrija tal-President tal-Kumitat Ewropew tar-Reġjuni (18 ta’ Mejju), bi tweġiba għall-Komunikazzjoni tal-Kummissjoni Ewropea dwar L-għajnuna lill-Ukrajna u r-rikostruzzjoni tagħha.
• Stqarrija għall-istampa: “Il-bliet u r-reġjuni jniedu l-Alleanza għar-rikostruzzjoni tal-Ukrajna” (30 ta’ Ġunju).
• Paġna webtal-Alleanza Ewropea tal-Bliet u r-Reġjuni għar-Rikostruzzjoni tal-Ukrajna

Persuni ta’ kuntatt:

Monica Tiberi, Kelliema għall-President, +32 479 51 74 43.

Andrew Gardner, Uffiċjal tal-istampa, +32 473 843 981.

Stephanie Paillet, appoġġ awdjoviżiv, +32 473 522 988.