Min?
Tista’ tapplika jekk inti:
- ġejt elett/a b’vot universali dirett fil-livell reġjonali jew lokali fi Stat Membru tal-Unjoni Ewropea jew f’pajjiż kandidat tal-UE;
- twelidt wara l-1 ta’ Jannar 1983;
- ma għandekx mandat bħala membru jew sostitut/a tal-KtR;
- għandek livell tajjeb ta’ Ingliż;
- timla l-formola tal-applikazzjoni u tibagħtha sa mhux aktar tard mill-10 ta’ April 2023.
Il-kandidati se jintgħażlu abbażi tal-kwalità tal-formola tal-applikazzjoni tagħhom u b’mod li jiġi żgurat bilanċ f’termini ta’ ġeneru, rappreżentanza reġjonali u lokali, affiljazzjoni politika u nazzjonalità.
Se jiġu kkunsidrati biss l-applikazzjonijiet bl-Ingliż jew bil-Franċiż.
Għaliex għandek tapplika?
- tibni network ma’ politiċi eletti żgħażagħ minn bnadi oħra fl-UE u ma’ politiċi oħra fil-livell lokali, reġjonali, nazzjonali u Ewropew;
- taqsam l-aħjar prattiki ma’ politiċi lokali u reġjonali oħra permezz tal-pjattaforma YEPcommunity.eu;
- tifhem l-opportunitajiet offruti mill-UE għaż-żoni lokali u reġjonali;
- titkellem f’isem ir-reġjuni u l-muniċipalitajiet tal-UE fil-proċess leġiżlattiv Ewropew;
- tikkontribwixxi għat-tfassil tal-politika tal-UE;
- tikseb viżibbiltà akbar fiċ-ċrieki Ewropej.
Barra minn hekk, il-politiċi eletti żgħażagħ magħżula se jkollhom l-opportunità li jipparteċipaw f’diversi attivitajiet ta’ komunikazzjoni relatati mal-programm.
X’joffri l-programm Politiċi Eletti Żgħażagħ?
Il-programm huwa strutturat madwar tliet suġġetti.
1. Kapitlu ġdid għad-demokrazija tal-UE
Il-programm Politiċi Eletti Żgħażagħ se jgħinek tibni rabtiet bejn il-belt u r-reġjun tiegħek u l-UE. Se jkun ta’ ispirazzjoni dwar kif trawwem id-demokrazija parteċipattiva u se jipprovdilek appoġġ biex issib modi kif tinvolvi liż-żgħażagħ fid-diskussjoni demokratika u fil-ħajja ċivika lokali.
2. L-indirizzar tal-kriżi klimatika u dik tal-enerġija
Taħt dan is-suġġett, il-programm Politiċi Eletti Żgħażagħ se jagħtik għarfien aktar profond dwar il-Patt Ekoloġiku Ewropew, biex tispira lill-oħrajn u tispira ruħek mill-proġetti ta’ politiċi eletti żgħażagħ, membri tal-KtR u politiċi oħra. Se ssir taf ukoll kif tista’ tikkontribwixxi għall-miri tal-UE dwar it-tibdil fil-klima u n-newtralità karbonika.
3. Il-ġejjieni tal-politika ta’ koeżjoni
Il-programm Politiċi Eletti Żgħażagħ se jippermettilek titgħallem dwar l-isfidi u l-opportunitajiet offruti mill-politika ta’ koeżjoni Ewropea. B’mod partikolari se titgħallem dwar l-opportunitajiet ta’ finanzjament għall-awtoritajiet lokali u reġjonali, li jispiraw proġetti innovattivi biex jappoġġjaw l-iżvilupp tar-reġjuni tal-UE, u dwar l-organizzazzjonijiet li jappoġġjaw lill-awtoritajiet lokali fit-twaqqif u l-implimentazzjoni tal-ideat tagħhom.
Il-laqgħat huma ppjanati li jsiru bl-Ingliż.
Meta?
Il-programm Politiċi Eletti Żgħażagħ 2023 se jdum għaddej sar-rebbiegħa tal-2024, u huma skedati attivitajiet matul is-sena kollha. Xi wħud minnhom huma obbligatorji.
Wara li tieħu sehem tingħata l-istatus ta’ alumnus/alumna u tiġi mistieden/mistiedna għal avvenimenti oħra.
Din hija lista proviżorja ta’ attivitajiet għall-2023. Jekk jogħġbok kun af li d-dati jistgħu jinbidlu.
Attivitajiet/avvenimenti addizzjonali jistgħu jiżdiedu matul is-sena. Inti se tiġi infurmat/a fi żmien debitu.
- sessjonijiet regolari ta’ networking
- parteċipazzjoni għal-laqgħat tal-kummissjonijiet u għas-sessjonijiet plenarji tal-KtR
- parteċipazzjoni f’konsultazzjonijiet pubbliċi
- 16 ta’ Mejju: laqgħa ta’ merħba – online – obbligatorja
- Ġunju: sessjoni ta’ taħriġ dwar “Kapitlu ġdid għad-demokrazija tal-UE” – obbligatorja
- 26-27 ta’ Ġunju: EuroPCom, Konferenza dwar il-Komunikazzjoni Pubblika tal-UE
- Settembru: sessjoni ta’ taħriġ dwar is-suġġett “Nindirizzaw il-kriżi klimatika u dik tal-enerġija” – obbligatorja
- 9-12 ta’ Ottubru: il-21 Ġimgħa Ewropea tar-Reġjuni u l-Bliet, sessjoni tal-Politiċi Eletti Żgħażagħ – obbligatorja
- Novembru: sessjoni ta’ taħriġ dwar “Il-ġejjieni tal-politika ta’ koeżjoni” – obbligatorja
Fejn?
L-avvenimenti se jsiru online u fil-KtR fi Brussell. Inti se tiġi infurmat/a fi żmien debitu dwar il-modalitajiet tal-attendenza.
Kif?
Biex tapplika, trid timla l-formola li ġejja bl-Ingliż jew bil-Franċiż:
Applikazzjoni biex tingħaqad mal-komunità tal-Politiċi Eletti Żgħażagħ
Kemm?
Ma jingħatawx allowances għall-parteċipazzjoni f’avvenimenti u attivitajiet online.
Fil-każ ta’ avvenimenti li jeħtieġu preżenza fiżika fi Brussell, il-KtR jista’:
- jagħti rimborż tal-ispejjeż tal-ivvjaġġar;
- iħallas indennizz fiss tas-sussistenza għal kull żjara, mal-preżentazzjoni ta’ prova ta’ waqfa ta’ lejl fil-post fejn tkun qed issir il-laqgħa.
Ir-rimborż tal-ispejjeż tal-ivvjaġġar u l-ħlas tal-indennizz tas-sussistenza jiddependu mill-baġit disponibbli.
Il-gruppi politiċi tal-KtR huma responsabbli għall-għażla finali tal-Politiċi Eletti Żgħażagħ għall-programm u għall-avvenimenti li għalihom ir-riżorsi huma limitati.