X’inhi l-Alleanza?
Il-#CohesionAlliance hija koalizzjoni ta’ dawk li jemmnu li l-politika ta’ koeżjoni tal-UE għandha tkompli tkun pilastru tal-ġejjieni tal-UE. L-Alleanza nħolqot permezz ta’ kooperazzjoni bejn l-assoċjazzjonijiet prinċipali Ewropej tal-bliet u r-reġjuni u l-Kumitat Ewropew tar-Reġjuni.
F’Lulju 2020, il-#CohesionAlliance adottat l-ewwel dikjarazzjoni mġedda 2.0 għal Ewropa koeżiva, sostenibbli u reżiljenti, li ggwidat il-ħidma tagħha wara li l-pandemija tal-COVID-19 bdiet tolqot liċ-ċittadini tal-Unjoni.
Sentejn wara, f’Ottubru 2022, l-emerġenzi l-ġodda, bħall-gwerra tar-Russja kontra l-Ukrajna u r-rati rekord tal-inflazzjoni kkawżati miż-żieda fil-prezzijiet tal-ikel u tal-enerġija, qed jagħmlu t-tisħiħ tal-koeżjoni bħala valur fundamentali tal-Unjoni Ewropea aktar urġenti minn qatt qabel.
Għal din ir-raġuni, l-imsieħba tal-#CohesionAlliance inġabru fi Brussell matul l-20 edizzjoni tal-Ġimgħa Ewropea tar-Reġjuni u l-Bliet biex jaffermaw mill-ġdid l-impenn tagħhom li jsaħħu l-politika ta’ koeżjoni u jżidu l-impatt territorjali tal-investimenti kollha tal-UE sabiex ikunu adatti għall-isfidi fit-tul tal-Ewropa.
Dikjarazzjoni mġedda
Permezz ta’ dikjarazzjoni konġunta ffirmata fit-12 ta’ Ottubru 2022, il-Kumitat Ewropew tar-Reġjuni u l-assoċjazzjonijiet prinċipali Ewropej tal-bliet u r-reġjuni qasmu r-rieda komuni li l-politika ta’ koeżjoni tinżamm bħala:
- l-aktar politika ta’ investiment importanti tal-UE;
- l-aktar strument viżibbli tal-UE fil-livell lokali u reġjonali;
- politika ta’ żvilupp fit-tul ibbażata fuq prinċipji ta’ ġestjoni kondiviża, sħubija u governanza f’diversi livelli;
- politika li ssegwi approċċ ibbażat fuq il-post u tindirizza d-diversità territorjali tal-Unjoni;
- għodda ewlenija għall-appoġġ tal-kooperazzjoni territorjali u l-promozzjoni tas-solidarjetà u l-integrazzjoni.
“Ejjew infakkru lil dawk kollha li jieħdu d-deċiżjonijiet fil-livell tal-UE u f’dak nazzjonali dwar ir-rwol indispensabbli li l-politika ta’ koeżjoni għandha fil-proċess ta’ integrazzjoni Ewropea!” tafferma d-Dikjarazzjoni, li biha l-#CohesionAlliance trid tibda ħidma li tħares ’il quddiem biex il-politika ta’ koeżjoni ssir aktar b’saħħitha, aktar sempliċi, aktar effettiva u orjentata lejn ir-riżultati, issa u fil-futur.
L-Alleanza tappella wkoll biex jiġi żgurat li l-koeżjoni tibqa’ valur ġenerali għall-Unjoni Ewropea billi tiżgura li l-politiki rilevanti kollha tal-UE jikkontribwixxu għat-tnaqqis tad-disparitajiet fost l-Istati Membri u fi ħdanhom.
Aqra d-Dikjarazzjoni“Id-dibattitu dwar il-futur tal-politika ta’ koeżjoni jibda issa!”