Tá sainchúram an-leathan ag coimisiún SEDEC faoina gcuimsítear iliomad réimsí beartas, lena n-áirítear na réimsí seo a leanas:

 Beartas fostaíochta, beartas sóisialta agus cosaint shóisialta

 Soghluaisteacht, comhdheiseanna

 Oideachas agus oiliúint

 Taighde agus nuálaíocht

 An clár oibre digiteach, sochaí faisnéise an Aontais Eorpaigh

 Líonraí tras-Eorpacha TFC

 An Tionscal closamhairc agus teicneolaíochtaí na meán

 Óige agus spórt

 Ilteangachas agus cur chun cinn teangacha mionlaigh, an chultúir agus na héagsúlachta cultúrtha

Ina theannta sin, bainistíonn SEDEC an tArdán um Malartú Faisnéise (KEP) , a chuir Coiste Eorpach na Réigiún ar bun i bpáirt le h Ard-Stiúrthóireacht an Choimisiúin Eorpaigh um Nuálaíocht agus Taighde (DG RTD). Is éard is aidhm don ardán réitigh nua i réimse an taighde agus na nuálaíochta, táirgí nuálacha agus dea-chleachtais a chur i láthair an phobail, trí sheimineáir a reáchtáil sa Bhruiséil agus imeachtaí idir piaraí a reáchtáil sna réigiúin, nó trí imeachtaí sárthaispeántais a chur ar siúl don phobal atá ag teacht le Plean Gníomhaíochta bliantúil KEP.

Ina cheann sin, tá sé beartaithe ag SEDEC earraíocht a bhaint i rith na bliana as Bliain Eorpach na hOidhreachta Cultúrtha (EYCH 2018) d’fhonn béim a leagan ar an ról bunúsach atá ag na húdaráis áitiúla agus réigiúnacha i dtaca le hOidhreacht Chultúrtha na hEorpa a bhainistiú, a chur chun cinn, a chosaint agus a chaomhnú.

Deis ar leith é EYCH lenar féidir páirt a thabhairt do na saoránaigh, go háirithe do leanaí agus don aos óg, in imeachtaí agus i dtionscadail atá dírithe ar bhéim a leagan ar luachanna agus oidhreacht chultúrtha na hEorpa.