Eolas faoi ENVE
Is é an Coimisiún um an gComhshaol, Athrú Aeráide agus Fuinneamh (ENVE) atá freagrach as na hacmhainní agus na hionstraimí is gá a ullmhú agus a chur ar fáil don Choiste le go bhféadfaidh sé a ról comhairleach a fheidhmiú go hiomlán i bpróiseas reachtach agus polaitiúil an Aontais.
Tacaíonn Coimisiún ENVE le CnaR in ullmhú na dteachtaireachtaí polaitiúla i réimsí a bhaineann leis an gComhaontú Glas don Eoraip. Seo cuid de na réimsí sin:
- An t-athrú aeráide
- fuinneamh
- Beartais spáis an Aontais Eorpaigh
- an bhithéagsúlacht
- an geilleagar ciorclach
- an sprioc maidir leis an truailliú nialasach.
Cuidíonn an fhoireann leis na comhaltaí tuairimí ENVE a dhréachtú agus tacaíonn sí leis an bpróiseas polaitiúil laistigh den Bhiúró agus sna seisiúin iomlánacha agus is í atá freagrach as tacaíocht a thabhairt do ghníomhaíochtaí leantacha agus do ghníomhaíochtaí meastóireachta tionchair. Is í atá freagrach as cruinnithe de chuid an choimisiúin agus imeachtaí seachtracha a eagrú sna réimsí beartais ábhartha.
Gníomhaíochtaí
An Mheitheal um an gComhaontú Glas ar an Leibhéal Áitiúil
Tá comhordú á dhéanamh freisin ag Coimisiún ENVE ar an Meitheal um an gComhaontú Glas ar an Leibhéal Áitiúil. Is den aidhm atá ag an tionscnamh traschoimisiúnda seo de chuid CnaR na cathracha agus na réigiúin a chur i gcroílár an Chomhaontaithe Ghlais don Eoraip. Is aidhm dó fós a áirithiú go mbeidh cistiú díreach ann le haghaidh na gcathracha agus na réigiún de thoradh ar straitéis fáis inbhuanaithe an Aontais, sin agus tionscadail inláimhsithe laistigh den Aontas a bheith de thoradh air. Cuireann Coimisiún ENVE leis an bhfeachtas ábhartha a bhaineann leis an gComhaontú Glas ar an Leibhéal Áitiúil.
Tascfhórsa 3
Tá Coimisiún ENVE i gceannas ar Thascfhórsa 3 a chomhordú, tascfhórsa a thacaíonn leis an Meitheal um an gComhaontú Glas ar an Leibhéal Áitiúil. Is é is príomhchuspóir do Thascfhórsa 3 an comhordú a éascú i ngach coimisiún, i ngach grúpa polaitiúil agus sna seirbhísí cumarsáide faoi seach. Dá réir sin, cinntíonn Tascfhórsa 3 go bhfuil comhsheasmhacht san obair reachtach a bhíonn á déanamh ag CnaR i dtaca leis an gComhaontú Glas.
Líonraí agus ardáin eile
I dteannta leis an méid sin, déanann Coimisiún ENVE comhordú ar ghníomhaíochtaí a bhaineann le Cúnant na Méaraí, tionscnamh arb é is aidhm dó páirt a thabhairt do na húdaráis áitiúla agus réigiúnacha sa chomhrac ar son beartais aeráide agus fuinnimh níos fearr.
Tá Coimisiún ENVE rannpháirteach sa Chomhshocrú Aeráide Eorpach, a bhfuil sé mar aidhm aige saoránaigh a chumasú chun Eoraip níos glaise a mhúnlú. Iarrtar ar chomhaltaí CnaR páirt a ghlacadh sa tionscnamh sin mar Ambasadóirí thar ceann an Chomhshocraithe Aeráide thar ceann CnaR. Trí bhíthin an tionscadail 4 Climate Pact cuireann CnaR tacaíocht ar fáil do na hAmbasadóirí sin trí imeachtaí áitiúla a eagrú i dtaobh na haeráide, imeachtaí ar fheasacht a mhúscailt agus an ghníomhaíocht aeráide a bhrú chun cinn ar an leibhéal áitiúil.
Tá Coimisiún ENVE i gceannas ar Ardán Gheallsealbhóirí an Truaillithe Nialasaigh chomh maith, rud a dhéanann sé i gcomhar leis an gCoimisiún Eorpach. Is chun na spriocanna atá ag gabháil leis an truailliú nialasach a aimsiú a cuireadh an tArdán sin ar bun, rud a thabharfar i gcrích maille le hidirphlé le gníomhaithe ó na pobail éagsúla agus ó réimsí éagsúla saineolais, lena n-áirítear na húdaráis áitiúla agus réigiúnacha.
Rannpháirtíocht ENVE ar an leibhéal domhanda
Ar an leibhéal domhanda, is ag Coimisiún ENVE atá an príomhról ina ionadaí dó ar CnaR ar chomhdhálacha de chuid na Náisiún Aontaithe maidir leis an athrú aeráide agus an bhithéagsúlacht. Is é Coimisiún ENVE atá freagrach as an gcomhordú ar thoscaireacht CnaR chuig COPanna UNFCCC. I dteannta leis an méid sin, déanann Coimisiún ENVE ionchur CnaR i gComhdhálacha Bithéagsúlachta na Náisiún Aontaithe (COPanna an Choinbhinsiúin maidir leis an mBithéagsúlacht) a chomhordú. Sa chomhthéacs seo, tá an ról comhdhréachtóra a bhí ag CnaR i nDearbhú Dhún Éideann maidir leis an gCreat Domhanda Bithéagsúlachta iar‑2020 ar cheann de na rudaí is mó a baineadh amach le deireanas, rud a léiríonn an tábhacht leis an rialachas il-leibhéil ar an leibhéal domhanda.